#家長必看 因為親身經歷，真係好希望各位家長會留意我呢篇文章，經常提醒自己千萬不要疏忽照顧自己孩子。其實我已經好耐無寫 blog或咁長篇既內容，但我覺得今次發生呢件事，好想同各位家長分享，希望大家帶小朋友出街時別掉以輕心。如果小朋友走失而揾唔番，後悔已經實在太遲了！ 好多朋友都覺得我對綿綿特別嚴格及過份緊張。因為我每次係街都一定要綿綿拖住我，唔准行開半步，如果係遊樂場及學校門口玩，都一定要係我附近及視線範圍，一行遠左小小，我就會好惡大鬧綿綿。所以有部份朋友都會覺得我過份緊張及保護小朋友， 唔信任自己囝囝，唔肯放手。雖然我睇得好緊，但無想象到，人多地方，一不留神，真係會令小朋友走失，事情竟然發生係我地身上！！！ 事情是這樣的： 8月7日(星期日) ，我和 綿綿既爺爺嫲嫲，3個大人一齊帶綿綿到新都會廣場頂樓遊樂場玩，呢日遊樂場特別多人， 有來過既應該知道有幾邊滑梯通道，如果小朋友上左去，家長都未必能留意到佢地係邊條滑梯走出來。一場來到，綿綿好想玩，見到咁多人，本來都唔想比佢玩，但我地有3個大人睇住， 估計應該無問題，諗住比佢玩一次滑梯就走。點知綿綿爬左上上面， 我地3個大人都留意唔到佢行左去邊，等左好耐，再過左幾分鐘仍然唔見綿綿蹤影， 四圍揾都唔見，開始好擔心好驚，本身諗住自己爬上上面揾，後來嫲嫲見到前面有另一個媽媽，陪住喊緊既綿綿打電話，我地即刻走過去相認，原來呢位好心媽媽打左2次電話比我，但我掛住揾綿綿，竟然無留意電話響，所以無聽到，估唔到綿綿咁驚時，都記得我電話號碼。一見到流住眼淚既綿綿， 真係好心痛。原來佢之前係黃色滑梯出左來後，揾左好耐都唔見我地，所以好驚。但我地3個大人竟然留意唔到佢， 當時實在太多人，好難揾，幸好綿綿懂得停留在附近無周圍走，遇到好人先無事，如果遇到壞人， 我諗以後都見唔番綿綿喇。 當時相認時，心情掛住安撫綿綿，都忘記了即場謝謝個位好心媽媽，幸好我有佢來電顯示，晚上即時whatapp謝謝佢，呢位媽媽話，我囝囝當時雖然喊緊，但都好清晰表達到及講到媽媽電話號碼，我真係好感激佢伸出援手幫綿綿。呢件事教訓到我自己，真係要睇實小朋友，雖然唔見幾分鐘，但幾分鐘都有機會出現任何預料唔到既意外。唔好諗住有多幾個人，多幾對眼幫手睇就鬆懈，仲有一定要留意電話有無響，如果有陌生電話打來都一定要聽，有機會係囝囝打來。以後如果去到人多擠迫既地方，我諗我一定唔比囝囝走開，攬到佢實一實呀！出街前都會幫定囝囝影張相， 萬一失散，方便形容當日既衣著。如果知道會去多人既地方，我諗我盡量都會幫囝囝著鮮色d既衫，容易睇到及辯認呀。大家可能覺得我行為誇張，但經歷完後，真的會控制唔到，更加緊張架。 經過呢件事，我發現綿綿原來真係好聽我話，佢真係記住我講過及教過既知識。其實佢學識數目字後，係佢約3歲時，我已經叫佢 #背熟爸爸媽媽電話號碼，記住我地既名，因為拍佢萬一走失時都可以揾人借電話打比我地。另外記住自己住邊度，邊幢大廈。我有同佢講， 如果係街或商場唔見左媽媽，一定要 #企原位唔好周圍走，如周圍走， 媽媽就會永遠揾唔返綿綿，所以當日綿綿走失左，都懂得留在遊樂場等媽媽，若走遠左就好大機會揾唔番。提佢記得盡量 #揾著制服既工作人員或帶住小朋友既家長幫忙，會比較安全。無想像到綿綿全部都記住，今次呢個小教訓，都令我更加珍惜自己囝囝。相信未必次次咁僥倖，小朋友真的失散了，若揾唔番，後悔都無用。 希望各位爸爸媽媽，睇完我呢篇詳文，會幫到大家盡預防小朋友走失，若不幸走失了也能教懂小朋如何自保方法。 最後，我想再次多謝及感激當日遇到的恩人，多謝你陪住綿綿揾媽媽，如果沒有你伸出援手，我想像唔到仲有無機會見番綿綿了~ 如果大家有小朋友追蹤器覺得方便實用，都不防介紹比我。   #綿綿媽媽 #綿綿重要記錄 #育兒 #新手媽媽 #不要再讓綿綿走失 #好好照顧自己孩兒 #尋好用追蹤器 #孩子走失了怎麼辦   歡迎隨時follow"綿綿媽媽"的足跡: https://www.mamibuy.com.hk/home/13092 https://wow.esdlife.com/sukimama http://mami.presslogic.com/author/suki/