今日係德望一年一度嘅 Christmas Funfair, 我作為家長兼校友, 當然要帶埋 Keicy Kassy 返學校, 同師長、同學一齊玩遊戲, 嘆精緻小食, 慶祝聖誕節! 以大合唱展開序幕 佳節聚首一堂, 校長致辭歡迎大家, 祝大家聖誕快樂!   喺簡單而隆重嘅刺破汽球儀式之後, 有德望合唱團唱歌表演, 為 Funfair 揭開序幕. 校長同各位老師都有一齊唱呀!   大型聖誕樹撐起節日氣氛 相信大家都見到, 合唱團身後有一棵好高嘅聖誕樹, Keicy Kassy 都有影相呀! 除此之外, 樓梯同其他空間都佈置得好細緻, 好有聖誕氣氛!   反轉迷宮箱 Funfair 有好多益智活動, 我覺得呢個箱幾得意.   其實佢係一個迷宮, 不過係望住塊鏡, 睇住倒影嚟行, 限時 40 秒. Keicy 玩得好投入!   貼心位: 有動有靜有美食 校方亦都安排咗波波池, 畀好動嘅小朋友玩吓. 更窩心嘅係, 小食部有好多食物同飲品, 全部都香噴噴, 又有足夠座位畀大家坐低慢慢嘆, 所以無論大人抑或小朋友, 都唔使驚玩到肚餓冇嘢食.   現場亦都有聖誕飾品同擺設出售. 仲有攤位可以整小手作同食物.   期間限定 - 靚靚閃粉紋身 圖案係德望嘅校徽同貓貓, Sister Pauline 當然要支持啦! :)   貓老師守護德望 呢次 Funfair 都有攤位介紹貓貓. 學校幾年前開始, 收養超過十隻無家可歸嘅流浪貓, 畀佢哋喺校園瞓覺, 自由自在咁享受生活. 隨後校方更成立愛護動物權益小組, 培養貓貓成為寵物大使同貓老師, 教導學生珍惜同愛護動物. 全校師生都同貓貓打成一片, 而貓老師亦都逐漸成為學校嘅一份子, 連師生大合照同火警演習, 都有佢哋份. 學校每年都會舉辦動物權益同愛護動物嘅講座, 從小教育學生點樣尊重、愛護動物, 做一個負責任嘅主人.   恭喜晒! 德望嘅同學唔單止愛護動物, 喺課外活動都一直表現出色, 最近更奪得多個獎項, 包括: 8th Winter Band Festival 2016 Hong Kong 管樂團比賽金獎   「愛傳承德育文化推廣計劃之弟子規演繹比賽及最佳服飾比賽、壁報設計比賽及德育文化週比賽」 演繹比賽及最佳服飾比賽 - 冠軍 壁報設計比賽及德育文化週比賽 - 最積極學校參與獎   道地 2016 年全港小學生徵文比賽 奪得多個獎項   仁濟醫院德育及公民教育獎勵基金 2016-2017年度獎勵計劃 以 “The Secrets of Joy” 項目獲得嘉許   2016-2017 年度校際田徑比賽 (九龍北) 女子甲組 - 團體冠軍 女子乙組 - 團體亞軍 女子丙組 - 團體冠軍 恭喜咁多位同學, 亦都希望各 Hopers 繼續發揮潛能, 以良好嘅 team spirit 繼續為校爭光! ^^   名人校友回饋母校 大家都知道, 德望有唔少名人校友, 喺唔同領域為校爭光, 而今年校方搵嚟其中 4 位設計利是封, 包括: 演員及歌手楊釆妮 (Charlie Young) 時裝設計師郭翠華 (Ranee K.) 2016 里約熱內盧奧運會馬拉松選手姚潔貞 (Christy Yiu) 音樂組合 Super Girls 成員吳嘉熙 (Cheronna Ng)   4 位都用靚靚嘅利是封設計, 回饋母校, 支持學校 Delia's Wing 籌款! 想買利是封支持嘅朋友要快手喇! 更新截止時間: 18/12 . 訂購表格: https://goo.gl/forms/zYwMaMJGLv3CLMRo1 查詢: info.ghspsa@gmail.com   後記: 家校合作 喺一年一度嘅 Christmas Funfair, 小朋友除咗可以輕鬆吓、玩吓之外， 家長同師長都可以趁呢個機會, 多啲接觸對方, 因為我相信小朋友嘅成長, 的確需要家校合作, 只要三方面溝通良好, 小朋友就會有更快樂嘅家庭同校園生活. 所以, 希望各位家長盡量抽空參加學校嘅活動, 同小朋友一齊享受快樂校園生活啦! ^^   FB: KeicyKK