想食好味曲奇又駛乜去排晒長龍同限住數量咁買呀？自己在家整話咁易！材料可以用最優質嘅！成品真係仲好味過熊仔罐餅店㗎！唔信？大家試過就知㗎喇！而家將秘方公諸於世，試唔試就由你話事喇！ umm...睇見都好回味，流晒口水呀！ 材料簡單，做法唔難，大家都試試丫！ 材料： 牛油 100g 糖霜 25g 麵粉 75g 粟粉 25g 份量方程式： 牛油：麵粉+粟粉 = 1：1 麵粉佔3/4，粟粉佔1/4 糖霜係牛油嘅1/4份量 如果用多過100g牛油就自己按著方程式再計計~ 由於我哋想一次過用晒罐牛油，所以材料份量會按住牛油份量再重新計一次。如果你都唔想開咗罐牛油放響度唔知下次幾時再用，就跟以下份量做啦！ 做法： 1. 先量糖霜份量337.5g 2. 然後量粟粉份量112.5g 3. 再量麵粉份量337.5g 金桶牛油454g，我哋視作為450g計算~ 4. 四樣材料都預備好晒！係時候去將啲材料撈埋一齊喇！ 5. 先將牛油與糖霜用攪拌器打勻 牛油可以一次過放晒落個兜度，但糖霜要逐少逐少咁落，我哋分咗4-5次落糖霜 ~ 糖霜同牛油混合好喇！望落係咪好軟滑、好吸引呢？如果你響現場聞到啲牛油香味仲正呀！XD 6. 篩入粟粉(分幾次)，然後用攪拌器攪勻 攪至冇晒粉粒就得喇！ 7. 最後篩入麵粉，由於麵粉份量比較多，所以比起糖霜同粟粉更要分多幾次落，之後用攪拌器打勻 有時啲邊位攪拌器攪唔到，要搵啲工具幫下手撥番落去中間，然後再攪過~ 將所有材料撈埋晒一齊之後，放在一旁備用。將焗爐預熱至180度~ 接住落嚟！可以預備擠花喇！ 揀番個啱用嘅擠咀先！呢盒嘢購自淘寶，都幾好用呀！ 用嚟擠曲奇嘅話，普通擠咀就ok喇！ 我揀咗最下排左二果款咀~ 揀好擠咀就要預備擠袋，先響擠袋嘅尖端位置剪一個小口，嘗試將擠咀放入擠袋內，睇下啱唔啱位。如果發現剪口太細，再略略剪多少少，再作調較。切勿一開始就將擠袋剪得太大個口，連擠咀都跌埋出嚟！XD 太大就番唔到轉頭㗎喇！^^''' 8. 將撈好嘅材料慢慢放入擠袋 9. 在焗爐盤上鋪一塊牛油紙，再響上面擠出曲奇餅形狀 10. 一糰一糰由晴朗擠嘅曲奇餅形狀，大小不一，咁先似出至小朋友手筆嘛！XD 11. 放入180度焗爐焗12分鐘至金黃色，焗梗嘅時候已經聞到好香喇！一出爐，晴朗就嚷著要試味！又真係難以抵擋美味嘅誘惑嘅~^^''' 晴朗媽媽都出手喇！我自己比較鍾意擠細啲，整一口曲奇。形狀睇落好細小，但其實焗出嚟係會扁啲同大塊咗㗎！ 新鮮熱辣辣出爐喇！我都忍唔住要整番件先~ ^o^ 賣相吸引嘛？試過就知道色、香、味俱全！ 由於材料份量多，我哋分咗七至八次入爐先能夠將所有曲奇焗製完成。期間，晴朗不停打啲曲奇主意！實行邊整邊食囉！XD 曲奇味道可以比美熊仔罐曲奇，真係有過之而無不及。話晒我哋所用嘅係金桶牛油喎！梗係好味啦！咬落鬆化無比，入口即溶，溶化後果種濃郁嘅牛油香味依然留在口腔內，滋味無窮。晴朗十分欣賞呢款曲奇，簡直食唔停口呀！的確超好味！^o^ 我哋仲發揮無限創意，擠咗一啲特別版心形曲奇添！送畀摯愛一流啦！^^ 做法簡單容易，話咁快就可以自製出好味鬆化嘅牛油曲奇喇！係咪冇介紹錯呢？不過要提提大家！唯一唔好買錯嘅係牛油，超巿果啲整出嚟冇咁好味㗎！去烘焙材料店買番罐金桶牛油啦！啲曲奇好唔好味，關鍵就在於用咩牛油喇！另外，如果天氣太熱，最好先將混合好嘅材料放入雪櫃雪半個鐘先拎出嚟擠花。焗出嚟嘅效果會靚啲㗎！整過一次之後，肯定大家會番唔到轉頭。以後想食好味曲奇唔係去餅店排隊，而係去烘焙店入材料呀！   BLOGs: