其實都有好多人話我仔好乖，會幫手，叫佢做咩就做咩，表達能力又叻，食野又快!佢地都會問下我點教!!!事實上我完全覺得係佢生出唻就咁..... 我會睇育兒書，會睇小朋友咩年齡多數會發生咩事，可能因為咁我所有事都會有心理準備!當你對所有事都會有心理準備既時候，你既耐性就會提升，因為你知道原來小朋友咁咁咁係好正常! 好似食野咁，個個都話我仔係咪前世無得食，今世好似餓鬼咁?6個月坐得穩個時我比佢嘗試自己拎野自己食，好多人話咁咪好污糟?係架，尤其有段時間佢地最鐘意掉野....FING野....少D心血都激死，不過好彩我家有養狗，地下既清潔就交比佢地!6個月未出牙食咩好?我比菜心，西蘭花，螺絲粉，粟米仔蒸到好熟!我唔係行全BLW(baby led weaning)，因為我有餵糊仔!我好怕出街整到成地成牆都係，所以出街都係餵粥餵糊!!如果想行BLW既話可以上網睇下人地點做!BLW既好處好多，第一係手口協調，第二咀嚼能力強可訓練講野能力!!我仔食野叻但都好揀擇架，或者因爲我比太多選擇佢寵壞左佢，佢食就食唔食就唔會食....但白飯佢可以食好多好多好多......... 講野好叻，好早就識表達自己，因為針住佢鍾意食野，由佢ee er er 到佢識講爸爸媽媽，我就成日要佢自己表達！問佢食唔食飯？一開始佢點頭，之後我會問爸爸要唔要飯，爸爸話要，佢見到就話要！要！好！食！係佢最快講到既字眼！之後到佢識行識走我開始要佢表達自己，出唔出街？佢會yes 或者no！到歲半我就要佢自己想做咩就出聲！好似佢指住門口我會等佢講想做咩先出門，一開始佢講唔到會喊我就會問佢係咪想出街？我會教佢講：去街呀！之後兩三次佢就識講！你會發現每個月佢都會進步，前一個月跟到講三個字後一個月已經講到4個字！到左兩歲就成句了！未到歲半都可以講自己想抱，想街街，小心，危險等之類既話！到依家2歲開心唔開心會講，想食咩都講，想玩咩會講！有時帶佢落街市問佢想食咩，佢都會講得出想食咩！所以好多人話佢把口好勁！雖然我覺得好正常，不過有時又真係嚇一跳，你上一分鐘講完下一分鐘佢都應用到！不過最重要係呀媽都要好鍾意講野！見到咩都講，見到的士就講的士，巴士就巴士！兩歲前吸收能力真係好強，過左就會停頓一下....停到幾時呢？我都唔知...不過暫時我做最錯係講顏色，因為我會比佢睇YouTube 聽英文歌，但講就母語為主，所以本身佢知咩係blue,但其他就分極都分唔到！所以講開一種語言最好就一直用個種語言啦！另外好多人話唔好用疊字，但疊字咁可愛，好難唔講....不過歲半之後我就越來越無講啦，我仔都無講啦，所以都唔怕既！ 總括好多書好多片好多人既意見： 1. 呀媽要多野講 2.BLW咀嚼能力訓練講野能力 3.三歲前同一種語言做母語唔好變嚟變去 4.出街見到咩就講咩，盡量唔好總括講晒而係分明（巴士、的士，消防車！麻雀、鷹...） 5.針對佢鐘意既事物加以發揮說話能力 6.比時間佢表達唔好急！ 7.佢嘗試同你講野你盡量答佢 8.把握兩歲前黃金期 都係個句，個個小朋友發展唔同，唔急得既！大人一急，小朋友心理就會有影響，反而會有反效果架！