作為雙職家長，4大長老又不在附近住，得知懷孕後，除了喜悅之外，還要考慮小孩出世後誰湊。 一般而言，大多數家長都會選擇請外傭。這樣既有人照顧小孩，又有人打理家頭細務。 不過我倆對外傭照顧小孩實在百般擔心。一來請好外傭實在十分睇運氣，還伴隨無限問題。溝通問題、衛生問題（大家都知新媽媽本身無潔癖，生完都變潔癖王）、令小朋友變成公主癌（外傭為求快d完成工作，食飯換衫等全部代為處理，小孩無學習機會。日間得又得佢倆在家，外傭會唔會同小孩互動真係......）、最怕無啦啦離職，我真係企響度... 好啦，咁怕外傭，咁就好多人會自己做全職媽媽。 真係在此讚揚各位全職媽媽，你地好偉大！本人唔係女強人，亦無事業心，年年等中六合彩，之後退休環遊世界。但等到產假完結，重回工作崗位，第一個感覺係一身輕鬆（bb 我真係對你唔住，個個媽媽都話返工好掛住bb)，好想同老細講我好鍾意返工。正如黃子華講：講得出『我好鍾意返工』呢句說話嘅人，一定係鬼上身。小人真係覺得自己好似鬼上身一樣。 仲有其他選擇的，有社區保母同育嬰園。前者係本地EE 湊，後者係托兒所。  本地EE 湊問題其實同外傭一樣，只不過轉左國籍同唔洗俾住宿，但一般去EE 屋企湊，直頭無得睇cctv  最終我地是選擇育嬰園。一般人聽托兒所都好反感，無限問題，好似我地送左佢去孤兒院一樣：  -好慘ga, bb 喊都無人理 -你點解可以咁恨心ga  -bb 食同訓之嘛，請工人咪得囉 -同bb 講：媽咪唔要你啦 (直頭想打鑊佢，問佢有無用個腦諗野） -學費請到工人啦 ，請工人仲有人同你做家務  所有所有的問題，我都用2、3句就打發左。因為我知唔理解就係唔理解，同佢解釋幾耐，佢地都會不斷質疑。最怕遇到問題少年，問足幾個鐘。 育嬰園在香港好少，因為政府開放外傭政策處理雙職家庭問題，外傭有幾萬人，育嬰園只有千幾個位，申請過都知好難排。 我只申請了一間育嬰園，育嬰園資料可在社會福利署找到 https://www.swd.gov.hk/tc/index/site_pubsvc/page_family/sub_listofserv/id_childcares/ 我懷孕期就已經申請，亦好好彩bb 兩個幾月大就可以入托。 下回分享育嬰園利弊。