上星期有朋友送咗份禮物畀我，本來應該好開心，但聽完佢嘅苦衷，我心情有啲複雜。佢送俾我嘅係一盒環保布尿片，真係好合我心意，梗係即時大讚佢有品味啦，點知原來佢都係逼不得已先送畀我。   事緣佢買咗包環保尿片返屋企之後，不斷俾老爺奶奶炮轟，話佢做乜虐待個乖孫，又話布片會唔舒服，又話會up爛個pat pat，仲鬧佢做人阿媽慳自己都唔應該慳個仔。搞到佢差啲大嗌：大人，冤枉啊！   聽完佢申冤我都替佢可憐，大佬，乜嘢年代呀？依家啲環保尿片好先進架，你估係以前嗰啲紗布片咩？佢呢隻牌子我有用開，我個B用咗之後，pat pat 皮膚仲好咗㖭，因為紙尿片始終有好多化學嘢，布片的確係比較溫和親膚嘅。   最重要係，我哋就話踏入中年老年，自私啲講句，地球滅亡我都可以話唔關我事，但阿B 仲有好多年要生活，一塊紙片要過百年都未必分解到，令地球不斷積聚毒素，到最後咪係害咗我哋嘅下一代囉。   雖然用環保尿片，真係慳咗好多錢，但係我絕對唔認同係因為慳錢先要用，講真，我哋做得人阿媽，情願自己用少啲錢，都想個BB用嘅嘢係好啲，點會為咗慳果幾千蚊去害自己個BB呀。唔該啲長老唔好成日諗到阿媽係大魔王咁款，我哋係絕對唔會虐待你個孫嘅，因為佢係我個仔，呢個世界上最愛錫佢嘅點會唔係我呀？   用環保尿片其實好多好處，唯一會令啲阿爸阿媽卻步嘅，我諗都係驚清洗困難，唔知會唔會爆屎爆尿之類。我可以用過來人嘅身份話俾大家聽，我BB用左咁耐就算屙幾大督屎，都冇爆過出嚟，反而用一啲大牌子嘅紙尿片，成日爆屎，所以佢鎖滲嘅cutting 做得好好。   至於清洗方面呢，我唔否認你見到督屎一開始係會有啲驚，但係其實用紙巾撥兩野就落咗廁所，再用水沖下，啲屎都甩咗九成，然後放入筒裏面浸，儲起一日幾條片，獨立開一機洗，話咁快就搞掂，做熟咗我唔覺得有幾難。   不過，當然要留意我係講緊係我用緊呢一隻環保尿片，其他有啲牌子我試過係比較難洗嘅，所以揀啱好用嘅環保尿片都非常重要。如果你哋心大心細，唔知點揀，都可以去我Facebook問我，答到嘅話我都盡量會答。     https://www.facebook.com/roadtomom