每次外出玩樂宿一宵，歸家後第二天，媽媽必定煲番啖湯俾兩位老細飲，清下熱，滋潤番，因為老細們容易熱氣，加上玩完番嚟感覺個人特別乾。 打算簡單煲個青紅蘿蔔馬碲湯，去到街市菜檔，菜檔阿姐推介天山雪蓮果，剛剛番到、降血脂、通便秘，仲教媽媽加紅蘿蔔、粟米、無花果去煲就得，好簡單！ 碗湯好清甜，兩位老細好like^^ 雪蓮果:清熱解毒，潤肺通便，抗氧化，增強免疫力   材料: 1. 雪蓮果 1大個 2. 紅蘿蔔 1個 3. 粟米 1枝 4. 無花果 3-4粒 5. 南北杏 適量 6. 肉 約30元 7. 水 3L 8. 薑 1小舊   做法: 1) 無花果及南北杏浸洗乾淨。無花果剪開一半。 2) 粟米洗淨，切開幾段。 3) 紅蘿蔔及雪蓮果分別去皮、洗淨、切件。 4) 肉汆水，備用。 5) 薑去皮，用刀啪一啪。 6) 煲內注入水，加入薑、無花果、南北杏、粟米、紅蘿蔔及肉，大火滾起，煲30分鐘，然後加入雪蓮果，再滾起後，轉小火煲1小時，加入少許鹽調味，完成，飲得。