芝麻上星期六即係6月9號訓醒晏覺就開始發燒，原本計劃等佢訓醒就出去赤柱行下街，發燒就當然取消左行程。見佢keep住低燒我同老公都冇話好擔心，因為佢係好有精神又肯食野，所以就比多啲水佢飲觀察下。 直至到夜晚開始燒勁左，到半夜仲燒到成40度，嚇死我地，但根據以往經驗就算去醫院都係得個等字，仲會搞到芝麻訓得唔好，所以我地最後決定都係等第日起身再去睇醫生。 因為知道一起身就要趕去睇醫生，所以訓覺前執好哂野，由起身計到出門口唔洗半個鐘。醫生判斷芝麻係喉嚨發炎引起發燒，又同我地解釋發燒唔係病，只係一個訊號話你知身體唔妥，除左腦膜炎引起發燒會燒壞腦外，其他即使燒到40度都唔會燒壞腦。就好似發生火警一樣，警鐘會響係提示你有火警，但警鐘響係唔會對火警嚴重性有影響，發燒亦然。醫生提醒我地假如退燒後出疹就要返去覆疹。第一次睇呢個醫生就感覺到佢有幾勁，對佢好有信心。 睇完醫生我地都按時餵芝麻食藥，起初佢好合作一啖啖食，但食多兩三次後就唔願意配合，唯有灌佢，灌到連媽咪都唔要，好傷心。退燒加消炎藥雙管齊下，燒得冇咁勁，但到半夜都高燒，食藥又搞到佢冇精神冇胃口，做媽咪嘅見到真係好心痛。keep住燒到第四日就開始退燒，有返哂精神，鬆左一口氣，點知第二日就出到一身疹，發現時已經係下午5點幾，早幾日睇嘅醫生都差唔多放工，又驚等唔切第二日，所以就咁喺屋企樓下診所睇左先。之前都有睇過呢個醫生，都細心而且係兒科，但今次我對佢有少少失望。原因係佢判斷芝麻啲疹係同手足口病有關，話唔係玫瑰疹，但我睇過資料再對比芝麻嘅情況，應該就係玫瑰疹。玫瑰疹發生高峰係半歲至兩歲，會突然發燒，但冇伴隨鼻水咳嗽情況，退燒後全身長滿紅疹，不痛不癢，幾日後自行消散。芝麻嘅情況就係咁，冇鼻水冇咳只係發高燒，退燒就出紅疹，啲疹就係扁平冇突出呈粉紅色，今日出疹第三日，啲紅疹已經開始自行消退。玫瑰疹唔需要特別治療，因為自己會退又不痛不癢，所以誤診就會令小朋友食多左不必要藥物。醫生開左止痕藥水，我仲灌芝麻食，食到佢勁累，中午訓左接近四個鐘都仲想訓，唉！ 今日見佢肯飲奶有精神有胃口，我就真係放心哂喇。不過咁樣病一病，媽咪又冇一千個大洋喇！