燈燈燈鄧！今日妹妹已經19週喇！今次懷孕初期同陀芝麻一樣經常流啡流血，雖然有經驗但係都會有各樣擔心。今次陀妹妹自己身體上嘅變化同口味同陀芝麻一樣，冇嘔冇暈，而且喺出Nifty報告當日我就夢見自己今胎係仔，夢境同真實係相反，所以我都估到好大機會今胎係女，不過仔好女好，只要佢健康就得喇！ 芝麻係喺美國出世，所以以示公平，我地已經準備緊12月要出發去美國待產，順便比自己去放下假，輕輕鬆鬆開開心心迎接妹妹黎到我地呢個家庭。 好多人都話香港好好，究竟點解要選擇去美國呢？原因係想佢地將來可以有多個選擇，無論係讀書、醫療定生活都好，中國大陸同香港唔得都仲有個美國大國比佢地揀。至於費用方面遠遠平過你要移民嘅錢，而且移民要坐移民監，你得到嘅亦只係一張綠卡，每年又規限住你離境時間，但出生於美國就係公民，有美國護照，即使長時間離開美國逗留返喺香港都冇問題。我同老公出生於普通家庭，喺我地心目中認為呢樣係比到佢地最好嘅禮物。