啱啱去完旅行番黎都未回魂，點知又俾裕喬喬嚇到魂魄都唔見埋。。。話說去完旅行番黎都好地地，食得行得玩得，仲帶左佢去剪頭髮～點知星期六既零晨就出事喇。。。 個晚正正常常9點零10點就上床飲埋奶就訓著左，但佢飲到一半就訓著左～～零晨3點幾就係咁郁，問佢係咪餓，佢話係就再沖奶俾佢食～食完好快又訓番～～點知過左一陣，4點零就係咁郁，就睇下佢做乜事啦～～點知一摸個額頭⋯⋯出事喇，滾到好似暖手蛋咁⋯⋯一量體溫就升到上40度⋯⋯嚇到阿媽我即刻醒左，搵退燒藥、幫佢換衫同抹身～～食左藥退左d, 佢訓得番就由佢訓，但我完全唔敢訓，因為佢第一次燒到咁高溫咋～呢一刻勁驚佢會燒到傻左。。。 終於捱到朝早，等到診所開門，即刻狂打電話去掛號⋯⋯都要等14個呀⋯⋯去到醫生伯伯度，講番個情況同埋近期有外遊，醫生都建議做快速測試（其實佢唔建議，我都會要求做埋個測試囉⋯⋯）好彩呢個家庭醫生有得做測試，檢測結果係證實裕喬喬係中左甲型流感⋯⋯好彩既係唔駛入院，不過都要食特敏福⋯⋯醫生仲話會燒幾日先退⋯⋯呢鑊真係肉赤死阿媽喇⋯⋯  燒到紅卜卜⋯⋯奶又唔食、水又唔飲⋯⋯  好彩裕喬喬退燒都算快，食左藥一日後，朝早已經冇咩燒，係夜晚有番燒，燒到38度～～我地照俾退燒藥佢食～～ 病左一日，個樣都叫有番精神～～    病左2日，基本上精靈番哂～完全冇燒喇～～  而家精力旺盛，但可惜我地仲會自我隔離多幾日，一黎等佢可以養好身體；二黎都廢事傳染俾人～～希望裕喬喬可以快點好番啦～～ P.S.: 1. 半夜發燒可大可小，尤其而家流感高峰期，真係配定平安藥看門口～不過d藥都係診所倒出黎，未食過既都只係放到3個月，開過既真係放1個月就要掉喇 2. 要搵定邊間診所有得做流感測試，唔係就要去醫院等架喇～～ 我家裕喬的PAGE, 媽媽盡量每日UPDATE喲~歡迎大家like and follow~~ 亦都歡迎大家聯絡我地合作及試用產品～ https://www.facebook.com/JacoYK/