媽媽們三思 冬甩媽媽後悔買咗嘅5樣bb用品 (戴返頭盔先) 個個bb嘅情況都唔同，有bb好啱用都未定嘅～ 1）護頭背包 使用次數：約3次 點解冇用：有種過份保護嘅感覺，因為其實我家已經有圍欄同地墊，但我又去淘一個返黎，呢啲咪愛囉。冬甩學坐學行時亦都好少向後跌。 2）幼兒專用嘅枕頭 使用次數：冬甩6-8個月嘅晏覺多數都瞓地墊，地墊太硬，會用枕頭。 點解冇用：初生時基本上係唔使用枕頭，而家冬甩歲半有時喺大床瞓，有時會瞓瞓下由大床碌返bb床瞓，喺邊度瞓都勁翻瞓，所以其實成晚個頭掂都無掂到個枕頭 ╮(╯▽╰)╭ 3）BB吹氣梳化 使用次數：約2次 點解冇用：我估係因為我個女唔鍾意被困，所以好憎坐喺入面，仲搖黎搖去。(╯‵□′)╯︵┻━┻ 4）食物研磨器 使用次數：約2次 點解冇用：開初餵過一陣子粥仔，但發現冬甩唔多鍾意餵，成日都唔擘開口，我冇耐性餵之下，轉咗baby-led weaning，食物唔使點加工，切成條狀就OK，買返黎嘅架橕就咁就荒廢咗。 5）控制出水速度嘅學習杯 使用次數：約5次 點解冇用：當我畀返普通杯畀冬甩飲水就發現自己買嘅學習杯嘅設計係太太太太體貼喇。人飲水唔會漏，係你眼尾睄到啲水去到邊，感覺到佢流緊幾快，幾時會流到嘴邊。冬甩見唔到啲水，舉高少少冇水，一野舉高勁多即刻一身都係，飲到鼻哥都有，慘慘豬。 ╮(￣▽￣"")╭   冬甩冬薑媽媽全職照顧一家七口兩大兩小三隻貓，每日以女兒「食曬碗飯」為目標，不停鑽研新菜式，由昔日的「無飯」太太搖身一變成為煮到幾味嘅合格廚娘！  想知更多冬甩冬薑的日常趣事，歡迎 follow 【小貓奴冬甩冬薑】 Facebook 和 Instagram 喔！ www.facebook.com/gingerdonut ｜www.instagram.com/gingerdonuthk