唔經唔覺就做左全職媽媽8個月，由完全唔識照顧初生bb到而家都總算比到意見幫助朋友們，的確係一個里程碑，所以要好好記錄呢段日子，每一個回憶都是珍貴的 睇到標題大家可能會嚇親，點解會住左6晚咁多? 我要解釋一下，臻臻係好平安地出世，經醫生檢查過係十分健康的，雖然只有2.45kg， 但係並唔需要訓箱同照燈，而我懷孕時中左妊娠糖尿，好彩亦無影響BB出現低血糖問題 一切都係因為來得太突然！ 其實當初我地原定39週開刀的，係剛剛踏入37週呢一日， 老公放工返到屋企，我準備換件衫同佢出去食飯 點知！突然見紅！又有少少扯住扯住既痛 根據 「見紅、穿水、陣痛」是旦一樣就要入醫院既指標 ，我地連走佬袋都未執就搭的士衝左去法國醫院喇 其實我一心諗住無咁快，最多咪觀察一下，所以叫原本過緊來既屋企人第2日先來探我啦 係登記入院時，姑娘叫我寫埋BB名，因為會印係張相到 我:「下，生得喇咩」 姑娘：「你有生產徵兆架喇wor!」 我：「即係今晚或者聽朝？」 姑娘：「係～」 我仍然覺得無咁快架，仲whatsapp同朋友＆媽媽谷吹水中～ 根住過左隔離房駁機測宮縮，過左15分鐘到，姑娘突然同我講醫生返緊來幫我開刀 我都明白我呢個情況如果半夜先黎料係會貴好多，仲要無得陪產， 所以都好多謝佢地做呢個決定呀，爸爸可以全程望住bb出世，沒有遺憾～～ 由入院到過床被推入手術室都只係一個鐘內既事，我係緊張到成身震晒， 無諗過會早咁多見到bb，又擔心佢既健康，好彩麻醉師，醫生團隊都十分風趣， 全程同我有講有笑，氣氛即時輕鬆左好多！ 成個麻醉過程我都唔覺得特別痛，過左10分鐘我下半身已經無晒知覺，老公入得來~ 我地又一齊談笑風生下，完全唔似生緊仔.. 又過左大約10分鐘，醫生話BB就出世喇，叫我老公幫手push下，最後出左黎一陣，就聽到喊聲，我係感動到喊左出黎！ （媽媽個樣太殘唔方便露面住） 而家諗返都眼濕濕～ 懷孕時期經歷無數焦慮、擔心、辛酸，又試過農曆7月14要係QE留院等等既事，終於成功平安帶BB來呢個世界上，終於同你相見了！多謝你揀選左我地做爸爸媽媽呀！   另外，其實我卵巢有一個變大到去6cm既畸胎瘤，係同bb影完相之後就做埋割除手術， 麻醉師又將藥調較到令我好眼訓好放鬆咁，一切順利～ 出到去已過左探病時間，老公同媽咪等埋我，我仲係好興奮又精神，一路被推走一路就叫佢地send返相比我tim 成晚都好夢幻呀! 咁就做左人呀媽了！ 然後得知陪月甩底，屋企咩都未執好，bb衫又未洗，我地又無人識湊初生bb， 一時之間好傍惶，幸好老公同屋企人都叫我放心休息多2晚同學下餵人奶，佢地幫我解決晒一切要難題，係愛呀 都好多謝法國醫院既姑娘，每一個都好幫得手，好好人，照顧好周到，連我生完後荷爾蒙改變加上擔心BB健康無啦啦喊左出黎，都會專登入來安慰我開解我 第一日麻藥過後子宮收縮時真係痛到暈，落床又係一大挑戰，完全演繹左BB來了時成班喪屍行去BB房既畫面～ 第3日時我傷口已經唔痛，仲可以帶朋友去睇BB，醫生手勢真係好   雖然媽咪日日燉湯煮飯比我食，其實醫院叫餐都係好唔錯～ 第一日好水既粥水，笑左～       而餵奶房內姑娘們好用心教同鼓勵我地餵人奶，又有水奶提供，我揀左illuma，只要唔好比壓力自己，就奶路暢通了～ 最開心係一班有共同目標既媽媽圍埋一齊，感覺好supportive呀！每朝都生機勃勃 成個餵奶房得臻臻一個要3個鐘餵一次，其他都係4個鐘，有時得我自己一個係到 細細粒～個個都認得佢由於早過37週出世先會跟早產指標，所以頭個幾月都一直位於生長線3％ 但好感恩～後來變左隻小豬仔了，遲下再分享吧 親子時間，爸爸每日只有15分鐘抱BB，好珍惜呢一刻啊    出院返屋企了，頭3個月既坐月＋地獄湊仔生涯，有誰共鳴～ TO BE CONTINUED.....   值得一提既係法國醫院CP值真係幾高，加上遇上一位仁醫，另外瘤手術由於唔關懷孕事，所以可以claim返少少保險，我個agent好快幫我安排好tim! 最後埋單同係私家醫院「無事無幹」生仔差價錢不多ja~~~ 家人，朋友，身邊一切幫助我地既人！感激有你地！我先可以順利渡過！   歡迎關注我地更多: www.facebook.com/chunchujai 小臻豬與祖兒媽媽 http://www.instagram.com/chunchujai