就到聖誕及新年假期，大家計劃了外遊未呢尋日跟小米爸講開12月去一個短程旅行輕鬆一下 好快就決定近近地來一個3日2夜澳門遊～黎個食～玩～訓～之旅 靈機一觸，突然醒起妹妹小悠B而家10個月，所有証件都未申請 家姐仔小米琪的特區護照就2020年5月到期，正常去澳門就唔需要預留半年護照有效期先可入澳門境內，但申請開妹妹護照，不如一次過幫家姐續埋期，免得半年後去旅行的話又遇上趕急做護照的問題 但距離出發日期只剩下19個工作日立即上網睇下趕唔趕得切申請，幸好申請新護照只需要10個工作天（一併申請身份証） **如以郵寄或投遞方式遞交申請表, 須額外預留2-3個工作天處理手續 而家姐仔續証只需5個工作天，時間岩岩好 不過每次做護照都好頭痛，浪費好多時間去睇清楚準備文件，怕漏了其中一份文件要由頭再郵寄到入境處就趕唔切申請 研究完一輪，同大家分享一下做小B生活照及續期申請手續懶人包： 首先要影証件相：証件相以白色背景為標準，衣服不建議穿太深色或太淺色，例如白色 因為會跟背景同色，俗稱"痴底"，到時得返個頭，所以我選了淺粉紅色 至於頭飾，可用黑色細小型的夾       基本上去影相舖話要特區護照證件相，職員都識得幫你安排   妹妹第一張証件相～個樣好呆～哈哈 *記得要著淺色衫呀  準備文件 小悠B申請新護照 1. 出世紙副本 2. 父/母的身份証副本 3. 申請護照（11歲以下）表格 ［ID 842] 4. 申請身份証表格［ROP3］ 5. 副署表格（即需要父/母以外的第三者簽名）［ID641］ 6. 相片3張（其中一張貼於副署表格上） 7. 支票 5歲家姐仔續証準備 1. 出世紙副本 2. 身份証副本 3. 父/母的身份証副本 4. 申請護照（11歲以下）表格（申請類別選"換領"）［ID 842] 5. 學校手冊個人資料頁副本，要附有相片及校印（代替了副署表格，如沒有手冊資料頁，則須填寫副署表格） 6. 相片2張 7. 支票 準備好晒啲資料可選投遞或郵寄方式交到入境處申請（親身遞交要準備文件嘅正本）     稍後會收到訊息通知可以領取新護照， 到時上網預約領取証件日子及時間，就可以輕鬆領証啦 預約領取証件網頁: www.gov.hk/tdbooking 文件交齊，就開始要安排行程喇 *支票抬頭「香港特別行政區政府 」 *特區護照收費：$185-32頁 /$230-48頁 表格連結： [ID842] https://www.immd.gov.hk/hkt/forms/forms/id842.html [ROP3] https://www.immd.gov.hk/hkt/forms/forms/rop3.html [ID641] https://www.immd.gov.hk/hkt/forms/forms/id641.html 申請香港特別行政區護照詳細資料傳送門 https://www.immd.gov.hk/hkt/service/travel_document/apply_for_hksar_passport.html