好耐無打blog啦！呢排媽媽手又復發痛到電話都唔想禁。。。 12月頭開始菠蘿包就開始唔太想飲奶， 到上個禮拜就已經早晚唔肯​飲， 突然間自己戒左奶， 媽媽表示好唔捨得。。。 好想係到記錄下做回憶。 人奶路真係好難，身邊既隊友，家人朋友支持好重要！ 多謝菠蘿包爸一路以來都支持我！ 不離不棄既豬隊友❤️ 陀菠蘿包個陣己經成日話打死都唔會喂人奶架！ 結果最後都動搖左，抱住喂到就喂，喂唔到就喂奶粉， *無論係喂人奶定奶粉，媽媽邊個決定都好一定係最錫bb個位！唔係唔喂人奶代表唔錫bb，最緊媽媽選擇一個舒服既方法。 呢570日真係好難行，有血有汗有淚有開心有感恩！ 初生既菠蘿包唔識埋身/樽飲奶， 泵出黎既奶比陪月用針筒一滴一滴喂菠蘿包。 識飲奶後每餐奶都要飲一個鐘， 每晚隔一個鐘都無就要起身喂奶， 慢慢開始由唔識飲奶到追奶飲。 經歷過幾次乳腺炎，真係痛到想死仲痛過生仔， 第一次唔識處理發到半邊乳房瘀黑色腫曬， 真係嚇死我。。。好彩最後及時睇醫生先無事。 仲有無數咁多次塞奶輕輕掂一掂都痛到死。 抗拒埋身既我最後都係屈服左， 因為真係慳好多時間，哈哈！ 菠蘿包開始出牙仲未識就住飲奶， 蓮姐經常性比佢咬到流哂血， 又係痛死我！ 成日問自己咁辛苦值得嗎？ 好值得好值得好值得！好重要所以要講三次！ 每日屬於我地倆既親密時光， 真係好窩心有咩煩惱都可以忘記曬， （搞到我好似死變態咁XD） 最重要可以比到抗體菠蘿包等佢健康d。 有時候屋企人心痛叫我唔好再喂人奶啦！ 其實本身諗住喂到菠蘿包6個月就算！ 結果唔捨得改口喂到1歲， 最後到1歲就話喂到菠蘿包自己戒奶！ 咁辛苦都捱過點解唔捱到最後呢？ 我成功了！我畢業啦！ 咁多位媽媽要加油呀！