揚揚爸爸和媽媽好鐘意同小羊們去效外玩，因為平日能夠接觸大自然嘅機會唔多，今次介紹呢個地方，我覺得係超讚，1日都玩唔晒。可以嚟呢度親親大自然、睇動物、行山、野餐一次過做晒~ 邊度咁正? 就係「嘉道理農場暨植物園」。 我哋4個人，揚細佬未夠5歲係免費，連觀光巴士只需要$100就玩足一日。 我哋入園後參加了2個導賞團- 「猛禽知多D」和「哺乳類動物知多D」，導賞員非常專業講解有關動物嘅資料和特色，每一團都係小班教學15-20人。例如「猛禽知多D」飼養員帶咗一隻貓頭鷹比我哋睇，超近距離接觸，團內嘅小朋友們都超專心咁聽，真係難得一見。其實仲有好多不同導賞團，全部都係免費，要參加就早啲掛隊報名。 小朋友好比心機行上斜路，加油⋯揚媽媽表示真係好斜 超近距離睇貓頭鷹講解 幾專心   果子狸 紅鶴 豹貓 兩棲及爬行動物屋，見唔見到蜥蝪？ 我哋買咗觀光巴士票可以舒舒服服咁上到山頂，其實園內的山路都幾斜，所以有年幼小朋友又想上山頂都係坐觀光巴士較好。觀光巴士有7個站，你可按自己想去睇嘅圜區落車。我哋坐到上山頂，風景十分優美，又有小草地可以野餐，旁邊有一條「超小秘道」，小朋友入去真係有探險嘅感覺，見到不少小朋友來回玩咗5-6次。 山水風景，很美~ 小型秘道，好似探險 呢度有新鮮雞蛋、有機菜賣，啱晒鍾意shopping 媽媽嘅需要~ 不知不覺已接近5點快關門，其實仲有好多地方未去，下次真係要再早啲來~ 後記：據導賞員講，園內所有動物都唔係購買，係有人棄養/ 係郊野被發現，經檢定後被認為不適合野放（有不少係傷殘），佢哋會喺園內住直到終老。令人反思，人類確係做咗好多傷害大自然嘅事 (食野味、製作皮草而擸殺動物、果子狸咖啡係由餵佢哋食不能消化嘅咖啡豆得來，原本野生嘅果子狸被迫變成飼養，加上飼養環境惡劣...)，我哋真係要保護環境，呢個都係愛護我哋下一代嘅責任 想知去嘉道理更多詳細資料/ 溫馨提示 ，請嚟我嘅Facebook 專頁啦 https://www.facebook.com/yeungyeungmama/