好多時都會聽到人講，你「清胎毒」未呀?  如果今胎係第一胎嘅你，等我分享一下咩係「清胎毒」啦，而作用又係乜嘢?   胎毒其實係孕婦懷孕期間吸收到嘅毒，例如: 飲食唔節制、食煎炸肥膩、過度滋補、脾氣暴躁、肝火旺盛，都有機會導致母親內熱過重，將「毒」傳俾BB，造成胎毒。   而胎毒又會對BB產生咩唔好嘅反應呢? 例如: 嬰幼兒出現濕疹、過敏性皮炎、皮膚出現瘡癤等等。   陀二寶嘅我，自己同先生本身有鼻敏感。上胎清胎毒清得唔夠，所以和牛B的確患有濕疹問題。 到而家濕疹，仍然一直纏繞住和牛B....都真係好苦惱!     有咩食物可以清胎毒? 孕婦可以選擇涼性嘅食物，例如: 西瓜*、綠豆沙、豆腐、腐竹、椰青、荷葉、薏米、白蓮鬚**、冬瓜皮、粟米鬚等。   *西瓜: 要注意果糖陷阱，如果有妊娠糖尿嘅子婦，都要控制食西瓜嘅份量哦。 **白蓮鬚: 有一個傳聞，體質啱嘅媽媽，飲咗會易啲生。相反體質唔合適，飲咗就會陣痛好耐都生唔到…(我就係後者，當年一飲完即刻頭暈兼作嘔…然後作動十幾個鐘先生到和牛B)。   另外保持大便通暢都好重要，所以要食多啲菜、飲多啲水。   幾時開始清胎毒 我自己就喺33週中期開始，但每個人體質都唔同，建議諮詢中醫意見再開始。如果太早進行清胎毒，BB未完全發育成熟，進食過度寒涼嘅食物，係會引起子宮收縮引至早產o架!! 所以，唔好心急呀!   【清胎毒湯水分享】 袪濕消腫湯 材料： 蓮子...........50克 粟米鬚........50克 鮮冬瓜皮.....100克 豬????肉........200克 蜜棗...........3粒 做法： 將以上材料洗淨，放入煲，加水1500毫升，用大火煲至水滾後，改用細火繼續煲1.5小時，加鹽調味即成。 功效：清熱利水消腫。   桑寄生蓮子蛋茶 材料： 桑寄生....1兩 蓮子.......1兩 雞蛋.......2隻 片糖.......少許 做法： 將雞蛋煮熟剝殼，再將桑寄生放入湯袋，加6至6 碗半清水同蓮子，用大火煲至水滾後，改用細火繼續煲2小時，加適量片糖調味。 功效: 補肝壯腎、養血祛風同安胎催乳嘅作用。   腐竹蛋糖水 材料： 水.......5-6 杯 腐竹....2大片 雞蛋....2隻 冰糖....適量 做法： 將雞蛋煮熟剝殼，腐竹清洗及浸淋後，大火煲10分鐘，改用細火煲45分鐘至1小時，加適量冰糖調味。 綠豆沙 材料： 綠豆.....2兩 陳皮.....1/4片 乾海帶..2兩 水........2000毫升 片糖.....適量 做法： 乾海帶洗淨浸水切絲， 以大火煲滾，加入全部材料（片糖除外）再煲滾後，轉文火煲1-1.5小時，直至綠豆淋身， 最後加適量片糖調味。 **由於綠豆沙偏涼，所以建議喺懷孕35周後先食。   【二寶孕記】入院公院走佬袋懶人包 | 順產篇 x 必帶眉筆 【二寶孕記】懷二胎嘅勇氣 | 係愛 x 陪伴成長 x 手足之情 【二寶孕記】QE妊娠糖尿。全日血糖測試 【二寶孕記】妊娠糖尿測試之飲糖水 (一) 【二寶孕記】第二次QE產檢分享 - 早期唐氏篩查 【二寶孕記】孕媽媽選擇護膚品、化妝品須知 【二寶孕記】醫院預約登記方法 及 第一次QE產檢分享 【二寶孕記】懷孕初期。一胎 VS 二胎大不同。   【準媽媽懶人包】初生BB。媽媽會禮物包 | 入會懶人包 -------------------------------------------------- 歡迎聯絡我&和牛B: chungying56@hotmail.com Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。