更新：首先多謝提醒！好多人話呀媽戴錯左口罩其實我係跟口罩個盒說明教學戴岩左既！**呢個方法只供參考，媽媽們可以選擇試或唔試。因為好多媽媽係菠蘿包facebook/ig見到菠蘿包肯戴口罩問有咩方法。咁我就決定出文希望幫到頭痛緊bb唔肯戴口罩既媽媽。話說菠蘿包好憎人搞佢個頭，戴帽都唔比會發脾氣天王都無面比，當然口罩都唔例外一戴就即刻發脾氣，香港咁樣真係好擔心會中招，所以諗左好多方法等菠蘿包肯戴口罩，終於一個方法成功咗！首先自己戴左口罩先以身作則，同佢講話去街街啦一陣要戴個口罩先，著好哂鞋準備好哂野我張菠蘿包上孭帶面對住我，雙手放係孭帶入邊（好似幾個月大既孭法咁）唔比佢伸到雙手上黎除口罩，幫菠蘿包戴口罩（預左頭幾日初初戴會爆喊）戴完就9秒9出門口等佢知道原來戴左口罩就可以出街啦！佢仲喊緊既就同佢講下你睇爸爸媽媽都戴口罩架，姨姨叔叔哥哥姐姐都戴口罩出街街，（通常姨姨聽到我咁講佢地就會好好人咁幫手同菠蘿包講嘩~戴左口罩好靚仔呀，叻叻呀）當然佢手會一直掙扎想舉上黎除口罩，菠蘿包媽雙手一直都禁住菠蘿包雙手，當過左一陣佢知道掙扎無用就唔會再反抗。放佢落地行頭幾日都會即刻除口罩，我地搵玩具/其他野（電子奶咀我係唔同意）引菠蘿包等佢分散左注意力，佢就唔記得左要除個口罩，如是者菠蘿包連續幾日都係用孭帶出入，（我條腰痛到爆）慢慢地每次戴口罩既掙扎小左，依加菠蘿包一見到個口罩都會唔肯戴，但係成功戴左上去之後佢就唔會除，因為知道戴左就可以即刻出街XD雖然唔知呢個方法對其他bb有無用，希望可以幫到大家！大家都要保護好自己！身體健康！****記得戴口罩前/除口罩後要徹底清洗雙手