四個半月前二寶菜蜜妹妹出咗世， 生妹妹之前都聽過好多人話越生得多，子宮頸就越開得快， 喺我生第一胎時，由陣痛開始到bb出世用咗10個鐘， 第二胎由痛開始到生只係3個幾鐘，而且第二胎感覺都冇咁辛苦， 老公入到產房，仲好奇怪點解我冇聞到笑氣添， 今次同大家分享下我嘅二胎生產經歷， 希望各位懷有第二胎嘅媽媽們都可以放鬆啲呀。   好記得一踏入39週，妹妹就一直向下轉， 有時訓覺都會感到強烈嘅宮縮，又會感覺到下身嘅骨俾妹妹撞緊， 不過姿勢一轉就會慢慢舒緩落嚟。 直到39週4當晚嘅半夜2點，當大家都熟睡之際， 一下好熟悉嘅「噗」一聲出現，生大女時呢聲就係穿羊水嘅聲音， 一世都難以忘記，今次有經驗就鎮定好多啦， 輕輕咁叫醒老公，安頓好大女就出發去屯門醫院， 喺2:45左右，陣動已經變成規律地5分鐘一次， 但呢個時候竟然截唔到的士，簡直好似睇緊電視劇咁，差啲要叫朋友揸車出嚟幫手。    第二胎順產福利-開得快生得快  上到產房，姑娘好快就同我磅重、換衫、問下問題， 然後就直入等生啦，當時大約係3:25， 而今次助產士一直喺我身邊冇行開，我就知道自己好快生得。   因為妹妹喺我肚入面嘅心跳有時變慢，為咗安全， 醫生決定落催生藥，仲講定一陣會開得好快， 過咗一陣，醫生見開嘅度數未似預期， 就伸手撩入嚟，一撩嗰下想屙嘅感覺直頭湧出嚟！ 媽呀！呢種久違嘅感覺真係好得人驚， 助產士叫我唔駛忍，用力屙出嚟，等個宮頸再開快啲。   可惜我每次陣痛間隔有成5分鐘，疏咗少少， 於是助產士又幫手撩下，其實用手撩嗰下仲痛過自然陣痛(我覺得)， 自問都算忍我痛呀，但每次撩入去我都會痛到慘叫， 好在遇到個好有經驗嘅助產士，佢教我打側身訓，話咁樣會開得快啲， 好彩有聽佢話，一側身訓除咗用力易咗好多， 連痛楚維持嘅時間都短啲，感覺好似肚痛要大便咁出力就得， 痛咗幾次之後，終於等到助產士講： 「而家清潔一下，預備個乾淨嘅地方俾bb出嚟啦」 好感動呀！竟然咁快開夠可以生啦！ 當時係5:30，好感動，只係痛咗2個鐘多啲就可以生， 唔怪得個個都話生第二個快好多啦。 切記聽從助產士指導 記得生大女時用錯力，生咗差不多一個鐘都未生到， 今次我就當去大便咁屙，原來咁就用岩力啦， 不過因為陣痛疏，用岩力都要控制好呼吸， 助產士教我唔痛時就要盡量定住，唔好俾妹妹縮返入去， 否則每次都要重新嚟過就好辛苦， 個陣痛疏到我同助產士仲可以輕鬆咁傾計，一痛我哋就回歸正題繼續生， 因為呢位助產士嘅指導，令我好有信心咁屙， 大約推咗3-4下，5:50am妹妹就出咗世啦。 產後突發狀況-失血 一切諗住好順利好開心時，卻突然聽到有人搵醫生，仲講咗句「blood bleeding」， 之後有人問我暈唔暈，初頭就冇嘅， 但過幾十秒直頭又暈又頭痛，佢哋立即幫我打止血針及子宮收縮藥， 再攪低張床俾我訓返喺度，而醫生就用人手幫我搓子宮， 醫生話好多生第二胎或以上嘅產婦，子宮都唔識自己收縮， 所以啲血就繼續流，而家佢幫我搓子宮， 係幫助收縮去止血，感恩好快就止咗血啦， 但聽老公講，佢都見到我流咗好多血出嚟，嗰刻佢緊張到直頭想喊。   而我，仲係一舊飯咁訓喺床度，唔知自己發生緊咩事。   因為失血嘅情況出現，所以要留喺產房觀察一個鐘， 感恩之後都冇特別狀況，可以轉返去產後病房啦， 不過因為子宮收縮不良，要靠自己努力搓肚，防止二次出血，順便排多啲惡露出嚟， 可能因為我太勤力，今胎嘅惡露2星期就得返少少，1個月就乾乾淨淨啦， 而今次亦有剪開少少會陰，因為剪嘅長度太短， 所以唔駛好似生大女時咁慘，因為會陰傷口而痛到喊啦， 而產後恢復亦比第一胎都快，成個過程都太感恩啦。