【 時刻注意小朋友情緒變化 】 閉關左咁多日，因為要去產檢所以一定要出門，加上爸爸放假，有人陪同就會安心d。 一如既往，我地有同Aidan解釋因為要出門辦事，會帶佢去婆婆屋企玩，但我地會好快番，番黎仲會買蛋糕俾佢食。 因為婆婆住第二座，同我地勁近，所以佢由細到大都經常去婆婆屋企度，又多人陪佢玩，除咗我，佢仲最鍾意就係痴住婆婆。 同以往一樣，我地如常帶佢過去，但出發前佢開始問我地係咪出街？係咪去商場行街？會唔會搭車車，會唔會去餐廳食飯？ 我地起初都唔太為意，係去的路程佢多次話要番屋企拎野，多次走回頭，半推半就去到婆婆屋企，除左的鞋又著番。 平時佢去到婆婆屋企會即刻跑去玩，從來都唔會好似今次咁，我果刻先諗佢應該係超級想同我地出街，佢以為我地可以去玩，閉關左咁多日，佢想搭車出街都好正常，但外面實在太多細菌了，我地又要去診所產檢，真係無辦法帶佢出去。 不停游說佢話會買好好味的蛋糕俾佢食，又會買新玩具俾佢玩，佢都唔願意放我地走，最後仲係婆婆的懷裡放聲大哭，真係望到都覺得好心痛呀！ 晚上接左佢番屋企，同佢一齊食蛋糕，佢開心到好似唔記得哂今朝件事咁。 但到臨訓前的一番對話，就知道其實佢真係好唔開心，佢問我今日出街點解唔可以帶佢去？點解唔可以去迪士尼玩？點解咁耐都唔番學？佢話好掛住老師，好掛住班同學仔，好想番學。。。。。講下講下攬住我就訓著左。。 攬住仔仔，果刻的感覺真係百感交集，眼淚完全不受控制咁流下。。。 係呢個防疫時期，小朋友太長時間留係屋企，足不出戶，無得出街，無得去佢地鍾意的公園玩，無得去戶外放電，佢地都會覺得奇怪和唔習慣，情緒一定會有影響，唔好話小朋友，真係連大人都會頂唔順。 所以家長們要多d同小朋友解釋和多聆聽佢地的內心感受，多觀察下小朋友的行為，佢地雖然細，但其實明白好多野，多些給他們安慰和鼓勵。 大家一齊努力，一齊祈求疫情快d退，快d係街上再見到大家的笑容！ ————————————————- 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記