豬仔包星期一出世, 星期三出院. 呢3日2夜..係我同佢獨處既第一次. 星期一早上生完BB, 上返4A. 自己先過床. 之後姑娘上床架話8個鐘唔可以落床. 而我返到房已經9am, 已經無早餐食, 所以佢地就俾左個豬仔包&鈣思寶我. 我趁BB去左檢查同仲係BB房.食左2啖就瞓覺. 同房有6張床, 好多BB係度喊..但我太攰, 理唔到咁多…. 當我以為我可以8個鐘不停瞓, 可以休息既時候, 10點幾有個姐姐推BB俾我, 叫我係床試餵奶. 我先要打側個人, 佢就將BB放係我旁邊俾佢吸吮乳房. 我係好明顯未上奶, 亦無乜奶俾佢食. 而BB以為自己仲係肚入面, 所以又繼續瞓..姐姐叫我要叫醒佢飲奶..但隻豬仔就無理我啦. 啜2下又瞓返~ 11am佢又抱走左佢. 我又可以抖一抖. 到12點, 佢地推返BB俾我. 因為探病時間到. 大少黎左, 佢個樣真係好攰, 佢自己話朝早一返到屋企咩都無做就瞓上床, 較好鬧鐘又準時12點返到醫院贂我地. 佢拎左熱水黎俾我焗炒米茶. 因為醫院怕病人會整親, 所以無熱水供應. 我都係好好彩拜託到一個姐姐俾左熱少少既水我一次. 我都唔想麻煩人地喇. 大少黎左我心又定左. 佢第一次抱BB個開心樣我都會記得. 1點, 探病時間完結. 大概2點BB再次推走左. 我以為可以抖下瞓下. 但原來要試下落床去廁所. 有姐姐先推張輪椅黎, 我自己要支撐住住落去. 之後佢幫手拎沖洗瓶, 網褲同產婦M巾就推我去廁所, 教我點換產婦M巾. 係有D le hea, 不過沖洗瓶真係令我覺得好乾淨舒服, 真係一件必用物件!! 我去完小便 (驚驚地痛, 但只係少痛) 之後用一條產婦M巾去印乾下體. 再用一條新既產婦M巾縛好. 先著網褲 (當底褲). 再著格仔病人衫褲. 完成!! 不過因為dup 低頭. 所以好頭暈. 我試大力呼吸止暈, 但都無咩幫助. 個姐姐叫我唔好用呢個生仔既方法. 總之頭暈就咩都唔好做. 坐低, 好返少少先慢慢起身. 之後我又再次推返病床. 準備再餵奶. 今次餵另一邊. 其實都無未有奶. 不過我諗都係等BB練習下. 瞓係度餵左1個鐘. 佢地放係BB係床仔. 之後就無推走喇. 一直係我身邊. 從此, 我就無咩點瞓…….始終有個B一齊, 而同房BBs 喊到拆天既時候, 做大人都可以照瞓, 但怕自己太攰瞓到自己個B喊都唔知. 所以又唔敢點瞓. 每3個鐘姑娘就會叫大家餵奶. 到6點探病時間, 大家又可以黎睇B&睇我喇~ 大少, 爸B, 媽媽, dodo, 99, kinnie 姑姐, alex, bena, jaime, 來媽媽都係呢2日有黎睇我地. 我就唔記得邊個邊日喇. 多謝佢地~~ 99仲煲左湯俾我做早餐添~~ 我2日朝早都慢行去門口請姑娘開門俾我攞湯, 再慢行返房. 而果2日趁BB俾人推左去打針/ 沖涼 (原來出世第一日唔沖涼. 只係抺走胎水&血)/ 檢查, 我就要去換M巾, 可以的話係床抖一抖.. 到8點病時間完結. 我就第一次坐係床隔離餵豬仔包~ 姑娘教我用咩姿勢, 咩方法等BB學識用力啜…但因為未上奶, BB點啜都無野食. 而我有頭暈, 所以第一晚佢地好有心叫我餵一陣就上床抖下, 佢地12點幾推走BB….推走BB後, 我趁機慢動作去換M巾, 再上床瞓都成1點. 到零晨2-3點, 姑娘黎開曬房燈叫大家餵奶. 呢個時候我都係瞓左一陣. 我又坐起身去餵B. 一切都好似好美好. 之後先係惡夢開始… 呢個過程總括而言, BB肚餓, 但無野食所以食唔到就喊..我就開始不停用唔同姿勢去餵佢.  果幾日我已經同左好多姑娘講我無奶, BB唔飽, 不停啜, 又不停喊…無論產後房姑娘, 姐姐, 母乳姑娘, 資深與否都黎睇過我. 佢地對我姿態有意見既, 點執點執, 我都好配合. 到幾次之後個個都話我個姿勢無問題. 就話BB啜啜下就有架喇…但眼見BB唔飽, 我又俾佢啜到第二日已經損左流血. 我推BB去姑娘房希望佢地可以餵佢. 但俾人band左叫我推返BB去床再自己餵…宜家諗返, 我EQ真係好高. 咁都無抑鬱….姑娘們其實都只係幫BB一日補過2-3次, 每次20ml既水奶….其實果刻做媽媽既我個人好攰, 但對住BB就要精神, 要餵佢又唔郁得, 炒米茶都無咩時間飲. 點會有奶?! 佢地成日覺得我一定有奶一定夠奶, 要埋身先會多奶….唉….. 家人黎探我, 我有同佢分享呢D事. 爸爸媽媽好心痛我同BB. 一個流曬血, 一個餓到喊…因為BB唔飽係咁喊, 我只可以安撫佢, 抱佢行行企企, 損左都俾佢啜. 當奶咀….期間姑娘有用過針筒管仔貼係我乳房, 等BB啜到有野. 佢好快就啜清一支, 因為佢真肚餓. 而姑娘永遠都係一句: 初生BB可以頭2日唔食野架. 真係激死人!!! 到第二日下午, 母乳姑娘教我用手吱入針筒餵BB, 佢好大力咁吱, 真係好痛架. 不過點吱都係得少少, 佢叫我飲多D水. 我都想…但BB在身邊, 佢又肚餓, 長期喊. 點有時間呢? 第二晚我一次餵3個鐘!! 係人地一早放低左BB, 我仲夾緊佢個頭仔, 塞佢埋心口俾佢啜緊!! 到人地下一餐, 我都仲餵緊!!! 由3am 俾BB啜到6am 終於有個姑娘發現同知道我既辛苦, 推走BB叫我抖抖..但其實7點佢地又叫醒大家食早餐 =.= 最後係姑娘唔俾水奶, 我又無奶, BB又好肚餓既情況下. 我唯有用針筒吱水俾佢飲…我知佢地個胃仔好細, 而初生BB唔使飲水. 但可以點呢? 到我出院果日, 叫媽媽開定支奶帶黎餵. 豬仔包一次就飲曬40ml. 同佢頭2日每日得60ml奶, 佢應該第一次有飽既感覺. 所以佢第一次咁瞓得好好.. 我臨出院前, 母乳姑娘再黎睇我. 佢地終於承認, 我係無奶. 再因為我已然2邊都損曬, 次次餵都出血同埋好好好痛. 咁餵係永遠唔會好返. 所以佢介紹左我用一個3M既pad, 希望我快D好返.可以再餵. 但………..呢2個損左既地方. 用左1個多星期先開始好. 我已經一個多星期無餵人奶. 本身少奶既我已經更少…..所以我好早已放棄人奶.. 另外, 最令我心痛係, 我地星期三出院. 星期買去健康院登記同檢查. 發現BB跌重7%!!!! 我話俾健康院醫生知醫院唔俾補水奶, 因為佢地覺得我一定有奶一定夠奶. 所以到佢地真係睇到我餵左3個鐘, BB仲喊先俾佢食水奶…健康院醫生話: 其實理論還理論, 現實始終係現實…咁令到BB食唔飽又為咩呢? 亦因為咁, BB要一星期返健康院2日, 去check 體重. 健康院醫生叫我一定要補奶粉俾BB, 唔夠奶佢唔飽. 再跌重去到10%就要入醫院. 我果刻真係心痛..加上一直都無抗拒奶粉. 所以豬仔包就開始左做奶粉B. 而我係佢3星期大, 泵曬D黃金初乳俾佢, 我就收山 lu~