芝芝由戒左夜奶之後開始我就一直訓練佢自己訓, 當然啦,咁細BB所謂自己訓都係我會係格離陪佢入睡, 直到佢訓林左我先會行開做自己野,但起碼係唔需要抱住佢,左行右行   最初,芝芝都一樣係需要抱住佢行左行右,左搖右搖等佢訓左先可以慢慢放低佢落床, 放低佢仲要勁小心,萬一一個唔好彩,佢醒左,又要重新左搖右搖等佢訓再慢慢放低佢落床, 芝媽我最多係試過一晚4次先成功放低到佢, 每次都起碼要半個鐘時間, 老公曾經有好多次都同我講,叫我放棄,攬住佢一齊訓, 因為攬住佢,佢就唔會醒, 而我就可以好安全地一覺訓天光, 但係我既角度, 我唔想晚晚都抱住佢訓, 對芝對我都唔係一件好既事, 所以我立下決心無論幾艱辛,我都要訓練芝芝可以自己訓...   於是我就決定要開始我既訓練大計,我覺得係要留意以下2點, - 環境 由於BB一日會訓幾次教, 所以我會將環境設定得唔同,日頭佢訓果時我就唔會熄晒所有燈, 亦唔會放佢係BB床, 只會放佢係High chair訓,而夜晚果教,我係會熄晒所有燈,著睡袋,仲會同佢哼下歌仔同say goodnight, 等BB會意識到已經係夜晚   -安全感 安全感都係非常重要既一環, 有安全感自己會訓得安穩好多, 所以我就選擇左俾奶咀同埋安撫公仔俾芝芝, 起初佢係唔會要, 你會覺得佢根本唔想要, 唔緊要, 你照放隻公仔係佢附近,照俾奶咀佢啜, 當時間耐左你會發現佢會伸身去搵個公仔,會自己拎奶咀塞落口, (當然啦,會有部分既媽媽會唔同意BB食奶咀, 但我就只係訓教時先俾佢啜, 平時日頭清醒既時候絕對唔會俾奶咀佢, 好多野,有得有失,大家可以自己衡量下)   後記: 唔好覺得做咁多野BB都唔知嫁啦,唔識嫁啦,你錯啦,BB係一定知一定識, 只要你有恆心,每日都堅持, 好快你就會意識到BB既改變, 或者你會話過程好辛苦,好晒時間,無錯,的確係咁, 但請相信自己相信你既寶寶,一定可以做到, 芝都一樣經歷過喊到一頭汗唔訓,一定要我抱既時候, 安撫左佢之後再放低,佢再喊,我再抱再安撫,再放低, 我諗我大約2-3個星期左右,芝芝已經可以自己訓教,除左試過出牙唔舒服有幾晚係我抱住佢訓之外, 其他時間都係我放佢係BB床,半個鐘內佢自己訓著,有時佢放夠電,10分鐘唔洗佢已經暈低左啦, 之後就係我最珍貴既me time啦~~~~ 而家只要有陪睡孖寶,芝芝無論係bb車,carseat都可以自己乖乖豬訓教嫁!   歡迎聯絡合作和活動,邀稿: Email: risako_ka@yahoo.com.hk Instagram: Tszyuchichi