前排因為小菜苗唔舒服感冒，為免飲奶惹痰， 嗰幾晚我哋都冇俾睡前奶菜苗飲，佢都好乖冇扭計， 仲明白自己有咳，所以唔可以食甜嘢凍嘢， 就因為咁，不知不覺間就戒咗奶， 到而家已經成兩星期冇飲奶啦。   為咗增加鈣嘅吸收，最近我都開始預備多啲奶類製品俾菜苗食， 而小菜苗一向十分鍾意食乳酪，不過最近少咗出去屋企存貨量少， 今日只係剩返一小盒，聽日又冇得食啦。   於是我決定用美的嘅高速鍋自製乳酪，自家製有好多好處， 就係甜味可以自己控制，而且材料相當簡單，倒哂入鍋中等8個鐘， 就可以製造到好多好多，慳返唔少錢呀。   自家製乳酪 食譜   材料：全脂牛奶1L、原味乳酪100g、煉奶80g   1. 將全部材料放入高速鍋中，拌勻後關蓋。 2. 選取酸奶功能，等待8小時完成烹調。 3. 將乳酪倒入玻璃器皿中保存即可。   煉奶用來調節甜度，可以自行調節份量。   ---------------------------------------------------------------------- ↓歡迎 Follow and like ↓ Facebook：芙芙little kitchen IG: fufu_littlekitchen ----------------------------------------------------------------------- 預熱後會進入倒數狀態，8小時完成時就會有音樂聲響起。 充份攪拌後會變得稀身少少，雪完又會變返乳酪狀態。 記住裝嘅器皿要熱水消毒，然後抹乾。 除咗就咁食，我哋仲會用自製乳酪整定健康早餐 - 鮮果乳酪麥皮， 呢個早餐我哋成日食，有營養又好味， 做法仲非常簡單：   第一層乳酪，第二層麥皮、水果， 第三層乳酪，第4層麥皮堅果脆片、水果。   完成後放入雪櫃，第二朝拌勻即可食用。 小菜苗今朝見到我食，都忍唔住問我咩嚟， 俾咗啖佢試就食到停唔到，真係好為食呀。