最近一星期有三日都要在家工作，忙嘅時候連午餐都會遲咗煮， 通常雞手鴨腳咁煮完菜苗嘅午餐後，我先會再解決自己食咩， 早幾日收到健康農場嘅冰鮮肉，望住塊半肥瘦梅頭肉， 真係口水都流埋，成個腦都係豬扒包， 一於整個簡易豬扒三文治慰勞下自己先。 豬排三文治 食譜   材料：梅頭豬扒1件、方包3塊、椰菜1/6個、蕃茄1個、沙津醬適量 醃料：生抽2湯匙、糖1茶匙、麻油0.5湯匙、生粉1茶匙   1. 豬扒洗淨後抹乾，用刀背拍鬆，再切成3小塊，以醃料醃1小時備用。 2. 蕃茄洗淨切片，椰菜切絲洗淨匿乾水，以沙律醬拌勻備用。 3. 燒熱油，中火把豬扒煎至兩面金黃，再倒入半碗水， 轉小火加蓋煮至豬扒熟透，再待醬汁收乾即可。 4. 以平底鍋把方包烘成多士，再將椰菜沙律、蕃茄及豬排放於兩片多士中間即可。   --------------------------------------------------------------------- ↓歡迎 Follow and like ↓ Facebook：芙芙little kitchen IG: fufu_littlekitchen -----------------------------------------------------------------------   健康農場嘅肉都係無添加、無激素， 整埋俾小朋友一齊食都得，又多個午餐選擇， 當然小朋友食就唔建議加生嘅蔬菜啦。   用刀背拍鬆啲肉，拍完成塊肉會變闊，再一開三切成小豬扒醃30分鐘。 椰菜沙津配豬扒真係好正，或者用一片生菜夾住都得。 芙芙為咗煎肉冇咁熱氣，通常都會加水加蓋小火煎， 呢個方法仲可以令肉熟得快啲，唔怕煎到乾爭爭。 等到汁料收乾時，豬扒已經熟透， 如果唔喜歡食多士，可以直接用方包夾住食，一樣都係咁美味架。 坐喺窗邊慢慢食，休息一下(其實食連抖都只係十幾分鐘)， 食完成個人充滿力量，又要繼續邊開工邊湊女啦。