難得可以出街食飯，今次同Yolanda一家仲有我同心心選擇左一間很地道嘅韓國餐廳，一齊食餐正嘅韓國菜！呢間位於荃灣嘅「韓閣」，餐牌款式算多選擇，價錢仲幾吸引，唔算好貴，可以同朋友叫多幾款唔同嘅食物都得，每碟嘅份量都抵食算大碟，而且仲比想像中好味添～ 今次我地叫左： 必食嘅「芝士岩漿炒飯」-$82 芝士味濃，帶有輕微辣味拉絲芝士極度邪惡，味道剛剛好，唔會太咸亦唔會太辣。 清新得黎又惹味嘅「田園沙律拼炸雞球」-$62 生菜新鮮，入口爽脆清甜，炸雞球唔會炸過龍，口感算juicy，雞球肉唔會太乾，唔錯！ 微辣開胃嘅「海蜆大醬湯」-$58 與餐牌圖片有點唔同，多左豆腐及海蜆變咗青口，圖片是清湯但變了紅湯，問了餐廳職員他說是這個湯，唔知真係職員攪錯左定真係呢款湯黎，不過都幾好飲，辣辣地幾開胃，我地都飲清光，下次再點呢個湯時大家就留意吓～ 必食香口嘅「鐵板牛肉」-$62/1人份 牛肉醬汁惹味，牛肉又夠嫩口，小朋友都食到，有雜菜伴炒，同樣好食！ 大人小朋友都岩食嘅「石鍋牛肉飯」-$52 牛肉嫩口，配上窩蛋，上碟時趁鍋熱將窩蛋與飯拌熟，十分惹味！ 必食「豬肉粉絲餃拼紫菜粉絲卷」-$48 炸餃及紫菜卷微脆，鍾意佢炸粉只是薄薄一層，味道唔錯，小朋友都啱食！ 簡單好味嘅「牛肉雜菜手卷」-$46 食韓國野唔少得要食埋韓國地道嘅壽司卷啦，壽司飯軟硬適中，牛肉夠嫩，配埋雜菜一齊食口感唔錯，而且唔辣，一件件咁好岩小朋友食㗎～ 必食嘅「亞之媽炸雞 -特調辣醬」半份-$108 呢款炸雞雞肉口感比我想像中嫩滑好多！以往食嘅韓國炸雞都是很乾，食完好口渴，呢個完全唔會乾，仲好juicy多汁，又唔會太辣，辣味剛剛好，超好食！ 解渴又健康嘅「碟豆花特飲」-$14 飲品不過不失，清淡口感，加左塊檸檬感覺再fresh啲！啲甜味沉喺杯底，要攪勻先好飲呀～ 好多食物小朋友都岩食，呢方面方便到我地呢啲家長，仲設有baby chair提供，但就無小朋友嘅餐具提供，所以如果要同小朋友去食，而小朋友未識用大人餐具嘅話，就記得自己帶餐具俾小朋友用啦～整體我地都非常滿意，價錢又唔算貴，呢間「韓閣」值得再去食！ #韓閣 #韓燒 #美食 #韓國菜 #荃灣韓閣 #荃灣韓國餐廳 #韓國餐 #荃灣美食 #荃灣美食推介 #hkblogger #hkfoodie