魷魚乾係一樣經常出現喺芙家雪櫃嘅食材，芙芙係客家人， 由細到大，家人們都好喜歡食魷魚乾同吊桶仔， 吊桶仔會切細後直接加豉油蒸，魷魚乾就會加粉絲炒， 今日就同大家介紹下魷魚乾炒粉絲，雖然唔係咩客家名菜， 但呢道菜喺我心目中就係客家家常菜之一， 簡單易煮又夠香，味道真係唔錯架。   魷魚乾炒粉絲 食譜 材料：魷魚乾2隻、粉絲1大包、蒜蓉2湯匙、薑片4片、蔥白4條、青蔥段適量 調味料：蠔油1湯匙、生抽1湯匙、糖少許、水半碗   1. 魷魚乾浸軟後洗淨，去掉軟骨及表皮，切成幼條備用；粉絲浸軟後剪短備用。 2. 燒熱油，爆香薑片及蔥白，倒入魷魚及蒜蓉以中火炒熟。 3. 倒入粉絲、調味料炒至汁料收乾，再倒入蔥段炒勻即可。 --------------------------------------------------------------------- **更多簡易食譜、小菜苗與菜蜜妹妹生活日誌** ↓歡迎 Follow and like ↓ Facebook：芙芙little kitchen IG: fufu_littlekitchen ----------------------------------------------------------------------- 魷魚乾浸軟後，口感只係比新鮮魷魚硬少少，但魷魚乾香味就更濃。 煮到汁料收乾，粉絲就唔會濕淋淋， 真係好喜歡呢種粉絲嘅質感。 遲啲向芙爸芙媽請教更多客家菜式先，到時再同大家分享下。