人地話，當女人懷孕後，就要好好享受做女王既哩十個月，因為之後，你既所有時間同心機，都會放左係自己既小朋友度。 係我無左份工後，哩個星期已經係我第三個星期係屋企安胎。或者對於某啲媽媽黎講，佢地會好享受哩個過程。但對於熱愛工作既我，哩三個星期就好似折磨咁。 每晚老公收工返屋企後，佢都會問我「你聽日有咩野做丫？」跟住我就會答佢「咪又係咁」，之後佢就會好努力咁幫我安掛「工作」 例如：你去公園行下，曬下太陽，散下步；又或者你去YouTube睇下，跟coffee做下運動；再唔係就係，你去書店睇下書，學下育兒資訊。。 我老公太了解我啦，就算之前返工既時候，我寧願返工，都唔想放假。佢知我怕悶，所以不斷每日搵節目俾我。 唔知點解，係哩個時候，我先發覺佢由一個「男仔」，變成一個要擔起頭家既「男人」 起初我仲返緊工既時候，我每日收工返到屋企，仲要洗衫，摺衫，有時仲要煮宵夜俾佢食，洗碗。佢係一個咩都唔做既人，同所有大男人一樣，一收工返到屋企，就係坐係梳發度，等人服侍，就算我有左，佢都係咁，冇變過。 但自從我無左份工後，我慢慢發覺佢有所改變，佢變得會照顧我既感受，會同我分擔家務，會關心我既睡眠質素。 有人話，「當一個男仔突然長大，係身邊既事情迫出黎。佢地會為佢所愛既人，作出改變」以前我成日都覺得我老公唔愛我，因為佢成日點我做野，又坐係度咩都唔做。但經歷左哩次之後，我先發覺我老公唔係唔愛我，只係佢唔善於表達。 有啲男人，係適當既時候，佢地就會企出黎，擔起頭家，保護自己愛既人-而我老公就係啲咁既人。多謝你