開始秋涼，最近多左帶大舊出戶外玩，呼吸下郊外空氣 唔睇都唔知原來香港都幾多戶外親子活動可以玩，呢幾個星期我地都去左幾個唔同既地方，今次去呢個種植園都幾大，好多野玩，本來擔心遊戲會唔會太刺激，去到發現2-3歲小朋友都玩到，本來小朋友今次既目標係想餵羊同滑草，點知去到樣樣遊戲都好吸引，滑草淨係玩左兩次就已經轉戰左其他遊戲 遊戲方面豐富又刺激，有滑草、腳踏高卡車、手搖船、滑梯、沙池、攀石、鞦韆、跳彈床、滑水道、飛索體驗，仲有一樣官網冇寫但又好好玩，好受小朋友歡迎嘅遊戲就係打水戰啦，除咗飛索體驗之外，我哋基本上全部都有玩，好多遊戲都適合大人同小朋友一齊玩 起初我哋見到係斜坡滑草都擔心會好快，小朋友太細會危險，但係因為佢加咗自製嘅車轆，所以滑落嚟嘅時候順得來又唔會太快，唔太大個嘅小朋友都可以玩到 因為大舊鍾意踩單車，所以佢都好鍾意玩腳踏高卡車，遊戲區入邊有好多唔同款嘅車可以踩，可以漂移嘅小朋友車、企喺度踩嘅腳踏車、氹氹轉嘅圍圈單車又有家庭單車     手搖船亦都係另外一個非常受小朋友歡迎嘅遊戲，可以大人同小朋友一齊坐/大人自己坐/小朋友自己坐 滑梯、沙池、攀石係同一個遊戲區，但係遊戲區位置露天，如果比較曬嘅日子就未必適合玩，因為滑梯係不鏽鋼嘅，我哋去到當日太曬好熱玩唔到，沙池同攀石都係太熱玩唔到，同埋眼見沙池啲沙都幾粗 我哋去嗰日天氣仲未轉涼，所以打水戰同埋滑水道都好受大家歡迎，亦都好好玩，提提大家如果想打水戰可以自己帶水槍去玩，或者嗰度都有水槍賣都唔係太貴嘅，同埋記得帶多套衫去換   想參加導賞+餵羊嘅朋友，建議先打電話問吓園方當日嘅導賞時間，因為每一日都未必一樣嘅，有時一日得一場，miss左就無架啦，有樣嘢我哋覺得幾好嘅，就係平時佢哋嘅羊係會放出嚟散步，而唔係長期困係籠入邊   飛索體驗需要自費嘅，收費係$60玩兩次，提提大家係有限額嘅，我哋去嗰日好快已經額滿左，如果想玩嘅話呢記得開始賣飛時就快啲去買啦，不過大嚿有啲怕高，所以我哋就冇玩啦 遊戲時間佢有全日票或半日票，買全日票嘅話可以自己帶午餐或者選擇喺場內BBQ，我哋就選擇咗BBQ，食物都OK嘅，不過呢個種植園嘅關門時間係16:30，如果想玩到夜晚嘅朋友就要注意啦   有興趣嘅朋友，記得最少兩日前上官網購票，及留意某些活動有指定時間開放。 地址: 沙頭角沙頭角公路石涌凹段禾田喜山種植園 電話/WHATSAPP: 60105978 網上預約:  www.wadakiyama.com 交通方面可以搭東鐵去到上水轉小巴55K，到左門口會有專人再車大家入園; 揸車人士記得預約泊車車位（泊車需另收費）   歡迎follow我facebook專頁：Miku媽媽&大舊