鶴咀一向出名係世外桃源，又多景點：雷音洞、廢堡、燈塔、鯨魚骨標本、蟹洞等等。既然都咁出名，都唔洗由阿娘實用文式再逐一介紹。今次分享下其它野～ 一直以為自己去好多隱世地點，去親都唔太多人，終於發現其實唔係個地點…係個時間！早一個鐘出發同遲一個鐘出發好唔同。之前假日7、8-10am去郊遊嘅我地，上星期日朝早大風又大霧，成家都比平時遲左起身。大概9點嘅去程都唔覺有咩問題，咁大地方得幾十人都行得好舒服，可以行下停下咁睇下海同花，甚至除口罩飲下水。 回程11:00就真係非常多人。一路走，見住一群群人（唔係一個個。。）湧入去。所以如果起到身的話，都試下早D出門口，會見到好唔同嘅風景。 另外，鶴咀海岸保護區係唔同一般海邊。 特別位係保護區呢三個字。都係有沙，又有石仔，但唔好諗住去剷沙同掉下石仔（兩樣都係奶油仔最愛），係連翻起塊石頭都唔可以。仲有排鯨魚骨，唔好掂呀唔該~~ 最後鶴咀係可以用BB車行哂全程或的士行9成嘅郊遊路。 我地的士入到鶴咀，係士多落車先開始行（行少一半路）。一路行都見有的士載客繼續入。去到電台個位，車就無得再入，再行15分鐘就到達鶴咀海岸保護區。 如果用BB車，除左一少段泥沙路地面唔平，其它都係車路，好輕鬆推到車。要落海岸保護區，我地將架車敝埋係唔阻人嘅地方。 揸車的話，係無正式車位，當日10點都未夠，就見鶴咀入口處抄緊牌。 想看看奶油仔的日常趣事，歡迎光臨Facebook Page《奶油阿娘與寶寶》和Follow Instagram《nylemamaandbaby》。