奶油仔已經無食下午茶嘅習慣好耐，主要因為大家6:30pm就晚餐。 咁無左下午茶，零食幾時俾呢？試過食完正餐先俾食零食，但發現佢會食到後期就唔清光光個碗，但扭要零食！ 於是就試下實行「你想幾時食就幾時食」方法，試左一排效果都唔錯喎！ 每日朝早我地會一齊放零食，包括無添加糖嘅提子乾、腰果、乳酪粒/穀物粒落一個零食盒，咁全日就係呢個份量嘅零食。可以揀早上就食哂，或慢慢全日食又得。總之今日食哂，就聽日先再有。 阿娘發現奶油仔除左無再要扭零食，無影響正餐胃口，仲學到要珍惜盒裡面嘅份量，會計住留返少少小睡完先食。不過有時吧口話要留返少少，但轉頭又打返開個蓋繼續食，好搞笑！見到佢忍住又忍唔住咁，哈哈，都係一個幾好嘅定力訓練~ 呢個方法，我係奶油仔剛開始會扭零食後好快開始試，令佢習慣唔係問媽媽/扭計就有。其實好習慣/壞習慣都係由持續嘅好行為/壞行為培養出來，所以如果發現小朋友有壞行為就要諗下計仔，免得佢變成習慣～ 同場加映，因為奶油仔成個腦都係食，#奶油仔搞笑語錄 暫時都係關食事： 1. 床前提子乾 2. 低頭思故香印提子 3. 1+1等魚麵（佢打邊爐最like就係魚麵...） 想看看奶油仔的日常趣事，歡迎光臨Facebook Page《奶油阿娘與寶寶》和Follow Instagram《nylemamaandbaby》。