【 平日無限任玩 室內兒童遊樂場 】 早幾日Aidan和幾個同學仔一齊去左樂富的室內兒童遊樂場玩，天氣咁熱，留係室內嘆住冷氣玩就最舒服啦！加上平日黎仲可以一個價錢，一大一小全日任玩，小朋友可以盡情地慢慢玩，無限放電～～～ 但可能臨近假期，平日的遊戲室都勁多人，如果可以再控制一下入場人數會更好，大家入場玩都要注意社交距離，帶好口罩，勤消毒雙手。   講番個遊樂場都真係幾啱小朋友玩，有動有靜又有工作坊，場地都算大，當中最受小朋友歡迎的一定係四條超長滑梯，充滿刺激感，而且滑梯上下都有職員睇住，確保安全，但因為人太多，家長們都要自己看顧小朋友的安全呀。   設備十足的小廚房，裡面唔單止有廚房用具，食物，蔬果麵包等，仲有洗衣機，收銀機，係一個鍾意玩煮飯仔的小天地。   男仔喜歡的小車房工程部，但人太多，入面的車車和工具好亂，配件成地都係，所以我哋無玩到。 場內仲有木頭粒沙池，迷宮區，彈跳床，車車天地，圖書區等等。仲有得玩歷奇探險吊橋，會有職員陪伴玩，需要配戴安全帽和安全繩，但Aidan未夠110cm高，所以未可以玩。   最欣賞佢哋會係中途有個清場消毒時段，確保場內乾淨衛生。遊樂場隔離就係佢哋的親子餐廳，但太多人無哂位，我哋無試到。我哋去咗另一間餐廳俾小朋友去休息食下野，之後又可以憑手帶再入場玩。   **記住要預約先好去呀，有人數限制。 免費登記做會員有入場優惠，仲會送防滑襪一對。場內有大量免費儲物櫃，先到先得。 **要注意星期六日及公眾假期係無全日任玩，仲要比較多人，所以都係平日黎玩盡興d又平d 收費詳情可以留意佢哋的網站。   *100 Fun樂滿紛* 地址：樂富廣場B區3205-3208號鋪 ————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com