不經不覺孕期去到第35週零6日，奶奶話要開始飲芝麻糊清胎毒，等我可以無咁辛苦咁迎接牛雜仔仔。所以今次會講咩胎毒同清胎毒既食譜。 何謂胎毒，為何要清呢又？！ 所謂「胎毒」是指孕婦懷孕期間進食熱氣食物，或本身屬燥熱體質，身體內熱恐傳給胎兒，令嬰兒易出現濕疹、奶癬等皮膚病。「清胎毒是預防性質，孕婦體內偏熱，如常生痱滋、暗瘡及便秘，又不能排內熱，便需清胎毒。」除本身體質偏熱，孕婦夜睡及工作勞累也是導致內熱成因。 坊間流傳可進食西瓜、綠豆沙、芝麻糊、腐竹薏米雞蛋糖水、白蓮鬚茶或椰子汁等。可助清胎毒。當中薏米及白蓮鬚未必適合大部分孕婦，西瓜及綠豆沙不宜過量食用。 另外提醒30周之前胎兒未完全發育成熟，不要太早進食涼性食物，否則有機會引致早產。 係咁多清胎毒食品中，芝麻糊適合大部分孕媽媽，因其味甘、性平、補血，且對一般人而言，尤其係陰虛體質人士，吃黑芝麻有助改善體質。黑芝麻營養方面，含豐富既脂肪、蛋白質、醣類、膳食纖維、維生素B群、E與鐵、鈣、鎂、鉀、鋅等多種微量礦物質。 好啦，芝麻糊，由沖裝到糖水店一碗碗既要買到都非常方便，但個人認為糖水店食到既可能係沖粉既又稀又過甜。買現成沖裝可能不是真芝麻糊，所以為左我同牛雜仔仔食得健康d決定自己動手整！   芝麻糊粉食譜 [建議，有妊娠糖尿的準媽媽最好不加糖，準媽媽們最好都小糖，更為健康。同樣適合糖尿病患者]   材料 黑芝麻 米(糯米粉亦可，但米較為正氣) 冰糖(白沙糖亦可，但冰糖為天然糖更為健康)   1.黑芝麻略洗，用白鑊慢火炒香，要小心不要炒濃或過度，炒岀芝麻香可熄火，放一邊待涼。(炒過度或濃就不宜用，因會燥熱食用後會感不適)   2.米略洗後，用白鑊炒至金黃色，熄火待涼。(如用糯米粉同樣需要炒至金黃色再涼)   3.待涼中，可敲碎冰糖待用(想方便點可用白糖)   4.把黑芝麻、米、敲碎冰糖放入攪拌機打至粉狀，想芝麻糖食起上黎細滑一d可用過濾網過濾，再打，重覆4至5次即成。   5.如想分幾次食用，可把未食用前既芝麻糊粉放入保鮮袋，再放於陰涼處，最佳放雪櫃，可保存10至15日。食用時可加入熱水直接食用，或用煲煮(煲煮會更香)。如甜度不夠可自行加入冰糖或白糖。