做左媽媽後，假日活動由宅在圖書館變成户外活動。要數最佳放電之選，一定係行山啦。上次成功挑戰菠蘿山後，今次目標係千島湖清景台。     上網搵過資料，大部份都係屯門行去元朗。不過我地最終目的地係屯門市中心，所以會由元朗大棠行返入屯門掃管笏，全程約9公里。 當日我地由朗屏西鐵站轉接駁巴士K66，係大棠山路落車。沿途行上去嘅路都幾舒服，唔算斜。去到中段開始無盡嘅樓梯。歷時2小時後終於上到清景台啦，風景好靚呀。估唔到3位小朋友都可以憑住自己力量行上去！真心要俾個讚佢地！     休息一陣睇下風景後，就起行嚕。落山嘅路程都算舒服，細寶行行下開始要抱。隔左一陣就瞓左嚕。最後係掃管笏坐小巴43去新墟。原定計劃係去市中心食糖水，最後太攰嘅關係，直接返屋企沖涼休息！ 總結千島湖清景台唔算太難行，沿途風景都唔錯，仲好多影靚相位添。拖男帶女，有老有嫩下，約4小時就行完啦。但係大家留意呀，個到無垃圾桶嫁。所以記住帶個膠袋袋垃圾，自己垃圾自己帶走呀！     當日有拍低行山過程，大家有興趣嘅就去睇下啦。   https://youtu.be/7Bl08E5hRg8   地點 ： 千島湖清景台 難度 ： ** (5星滿分) 時間  :  3-4小時