副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

廣華醫院順產媽媽 : 傳說中的「攞我命三千」…(陣痛最可怕)

非常感恩,懷胎十月以來一直陀得幾舒服,完全無孕吐,行得走得食得訓得痾得,生活如常,行動自如,頭6個月體形亦無明顯變化,所以好多人都唔知我有咗BB。直至預產期前2-3個星期,個肚越來越重,開始坐立不安,

非常感恩,懷胎十月以來一直陀得幾舒服,完全無孕吐,行得走得食得訓得痾得,生活如常,行動自如,頭6個月體形亦無明顯變化,所以好多人都唔知我有咗BB。直至預產期前2-3個星期,個肚越來越重,開始坐立不安,條腰開始酸痛,瞓到半夜就會起身,第二朝又要如常起身返工,十分煎熬。 (孕照拍攝於32週,當時個肚仍然未算大,攝影師叫我挺個肚出嚟,但挺完都係唔大……)   究竟幾時生得? 踏入預產期前一個星期,每朝起身都問一次呢個問題,然後每一日都有少少失望……自然分娩就有呢種令人又怕又期待,坐立不安的感覺。   預產期的早上,如常起身梳洗,「見紅」了,心諗阿女真係好準時喎!無陣痛亦無唔舒服,焗定炒米茶,拎定走佬袋,叫醒老公落街食早餐,食飽就去醫院檢查。當時以為自己好醒,準備充足,點知「空歡喜」一場…… 人生自有認知以來第一次住醫院,每次醫生嚟檢查我都會問下醫生幾時生得,醫生當然話唔知道啦!既然住咗2晚都無動靜,醫生俾咗另一個日子叫我入院催生,又要等多7日,好不情願地出院。   自然分娩真係令人好驚喜!明明出院嗰陣毫無動靜,點知當晚突然嚟料,終於經歷到傳說中的陣痛,由無規律的陣痛直至20分鐘一次、15分鐘一次,心諗今次應該真係生得喇!由於之前住咗2晚醫院都「空歡喜」,我唔想咁快入院,於是忍痛忍左成晚,流咗好多血,坐立不安,痛到瞓唔到,理性地執返個「走佬袋」出嚟,預備好炒米茶,忍到第二朝叫醒老公送我入院。今次痛到行去食早餐的力都無,一落街就直接搭的士去醫院。   去到醫院完成一系列的檢查,原來仲要「等」!等到開始5分鐘一次陣痛,等到穿羊水先可以生,否則下午醫生檢查後再決定係咪可以落催生劑......當時我無奈到不得了,唯有沉著應戰,學阿媽話齋,食飽先有氣力生,於是乎無胃口都食返個M記早餐先!痛,越來越痛,痛到不行,坐坐下瑜珈波突然穿羊水了 (好似賴尿咁,有堆暖水湧流出來),姑娘話準備進入產程了。   下?原來仲未生得㗎?未啊,子宮頸未開夠度數,之後我依稀記得痛到發顛,好似想痾屎但又唔可以痾出來咁,又無笑氣又無止痛針,真係攞我命三千!望穿秋水,死忍到助產仕行嚟話差不多了,產房有位就可以推我入去。下?產房無位的話點算好?好彩產房有位,可以即刻推我入去。   入到產房,無電視情節見到咁恐怖,又或者我已經痛到迷迷糊糊了…… 助產仕同助理都好友善,一直鼓勵我捱過去......「媽媽,你同BB都好叻啊!BB出世了!」終於順利卸貨了,正式當媽媽了 ! 明明前幾分鐘痛到欲生欲死,助產仕將孫姑娘放喺我心口做母嬰接觸,彷彿一切痛楚都忘記了,果種感覺好奇妙啊! (無錯,孫姑娘真名叫Ellie ^___^)   2019年1月廣華醫院順產媽媽分享 ♡孫師奶♡ 80後女生 l 香港媽媽 l 加拿大移民 https://www.facebook.com/workingmamabyemi