副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

[媽媽心聲]我的產後抑鬱症

[媽媽心聲]我的產後抑鬱症

[媽媽心聲]我的產後抑鬱症 日本女藝人竹內結子疑因產後抑鬱症而自殺身亡,一代日劇女星曇花萎謝,令人倍感傷心。 產後抑鬱症的出現一般都是由多個因素相互影響而形成。當嬰兒出生後,媽媽的荷爾蒙會有巨大的變化,荷爾蒙會直接影響到大腦控制情緒的部份。除此之外,以下情況亦會增加患上產後抑鬱症的機會: 1)曾經患有精神病,如抑鬱症或焦慮症。 2)有家族成員曾有抑鬱問題。 3)生產期間發生事故,如難產或新生嬰兒夭折。 4)生活上的轉變,如夫妻關係欠佳、婆媳關係不協調或有家庭經濟問題。 5)缺乏支援、令產婦過分操勞。 6)嬰兒有嚴重先天性疾病或健康問題。 其實我們倆夫婦是有計劃和準備懷孕的,我自己曾因小產而患過輕度的抑鬱症。 最主要令我患上產後抑鬱症的原因是生活上的巨大轉變,相信大部分產婦也經歷過這些轉變。 首先,由未誕下BB前,我們一家人已因由誰來照顧BB和BB出生後是否要跟父母同住而有所分歧。由於當時我是在職媽媽,丈夫的家人想幫忙照顧BB,所以建議我們把BB放在他家人家,放假才接回自己家。當時我極力反對,雖然BB還未出生,但我相信母子相連,而且我想餵哺人奶,分開住根本不太可行。由那時開始,大家的意見已經不合。 到BB出世,感覺一切都來得佷突然!雖然我是剖腹,一早就知道他們在何年何月何日出生,但所有的變化也是不能一下子就能接受,因為所有事情也不是想像般的簡單! 第一,屋企真係好多人!!! 以前,屋企得2個人。自己鐘意做乜都得,去廁所又好,沖涼又好,都唔使鎖門。鐘意喺屋企唱歌跳舞,做乜都唔使理其他人。但由BB未出世前一個月,首先多左工人姐姐,我開始不能在家中為所慾為。之後孖寶出世,又多左兩個人,仲有老公家兩老和陪月。屋企突然多左6個人呀! 第二,寶寶唔至可愛,仲好怪獸! BB得意就得意,但湊初生是真係好辛苦!未生前,以為湊B都係餵奶和換片,好似兒時玩洋娃娃咁簡單。Oh...No~是我太天真吧!對於新手媽媽來說更是無所適從!BB喊,初時我真係唔知佢喊乜,每次喊都要估下佢做乜,睇下估唔估得中呢!到逗訓覺先辛苦,抱下搖下,訓著左一放落床又醒。到夜晚,無限輪迴嘅飲奶掃風逗睡和換片,我仲要有兩個一齊同我玩成晚,基本上真係無乜點訓過覺......嗚嗚~~ 第三,自信的工人姐姐 有自信固然是好,但自信到不會聽我的意見時就有點麻煩。其實回想第一個工人姐姐很勤力,又有湊小朋友的經驗。這些方面絶對是一個好工人。但由於她有經驗,所以當我建議用從健康院學到嘅湊BB方法時,她便不會跟從。另外,我當時缺乏餵哺母乳的經驗和知識,不懂埋身又泵奶的次數不多,所以母乳一直不算多。直至有一次去到健康院,姑娘教我正確的哺乳知識,我才懂如何埋身。有一次,細孖感到肚餓,想喝奶,我要求從工人手上接過細孖來埋身,怎料她拒絶,說「你冇奶餵乜野!」。我連想餵奶都被拒絶,想透過埋身來刺激造奶也被拒絶了... ...媽媽好像很沒用... ...感覺好似仲被工人寸......嗚嗚~~ 第四,神隊友變豬隊友 BB未出世前,隊友照顧周到,說話語帶溫柔,亦有求必應。但BB出世後,佢完美演繹左豬隊友這角色!!!!因為受到產後荷爾蒙的影響,我個人變得很神經緊張,看見甚麼也不順意,但又唔敢出聲。例如,工人姐姐換片後沒洗手就直接去預備炒米茶,每次我見到都十分不開心,但之前已說過,再一次發生時我又不太願意在面前再說(可能受到荷爾蒙的影響)。於是我便跟隊友說,每一次他只會說悔氣說話,「炒左佢囉」。又好似上面提到工人不給我餵奶,他又為她辨護,說:「佢關心BB咋」。男親友在坐月間經常到訪,跟隊友說,這樣餵人奶不太方便,無論是親餵或泵也不太方便(因初生時要餵和泵得很頻密)。隊友說:「係咪叫佢唔好上黎呀」。這個時候的隊友只是升級到豬隊友的階段,之後仲會再進化! 第五,湊B意見分歧 由於小朋友是每個母親心中最重要的人,所以每位母親都希望給最好的小朋友。每當遇到關乎BB的事無大小都不會讓步!只是沖涼的水溫已每天也會爭論,我用手肘測溫度;照顧者用手掌。到喝奶我用臉頰測溫度,令願凍多過熱;照顧者用奶嘴滴些奶到手背上,令願熱多過凍。小朋友發燒,我會依醫生指示,過了38度才給藥,照顧者認為37度也要給,連續兩三天用藥。這些都只是芝麻綠豆中的其中一些。各人每天就是為著不同的事堅持己見。跟豬隊友說,他只會說:「可以點呀?」。問番我轉頭添,真係令我招架不住,亦都無野同佢講。他正式升級成為「神級豬隊友」!在照顧者的角度想,他們也是把自己認為「最好」的給BB,覺得俾得人湊就唔好咁多意見。到我自己忍唔住出聲時,我又會變成「千古罪人」。 第六,豬隊友壓力大 正因為每日糾纏於這些事情,豬隊友其實壓力亦很大!在隊友的角度,明白太太的意見是對的,但不是說了,他人便會跟從,所以也無能為力。夫妻關係亦都變差,沒有以前般甜蜜,我們也經常為小事(總之是關於BB的事)而吵架。 第七,我的人奶很珍貴,請珍重! 仲有我D人奶呀~我每日都好辛苦泵同半夜起身泵或餵先keep到奶量架!但其他人視之為普通奶,加熱時可能超過了55度或者放左入玻璃奶樽餵BB,D抗體無哂,咁我仲乜要咁辛苦餵人奶呀??到餵剩左幾ml,又唔餵埋去,仲話得番少少啫......但滴滴皆辛苦!餵過人奶嘅一定明白。 去到一個位,我每一天放工也站在家門前很害怕走進家裡。世上唯有令我感到幸褔的只有兩隻小魔怪,也是我唯一生存的動力。我也曾經想過了結,但我又很想看著他們長大。 這些生活,還未計算返工真係好辛苦!可能有人會說係人返工都辛苦,但坦白講,好多野都係有苦自己知,好難列出哂所有野黎比較。當時份工仲辛苦過做全職媽媽一打二而冇工人,每個月都起碼病一次,發高燒,挨到身體好差。每一日都要五點幾起身,其實夜晚要湊BB,已經冇乜訓過。每一次出門,又要忍受住BB因唔捨得媽媽呼天搶地嘅哭聲。返工又要好用神,迫自己短時間內盡做。放工又要帶著工作回家,等BB訓左繼續做。但有些日子好忙,日日開會,返到屋企BB已訓左,可以連續一星期無同BB見面(除了訓著左)。跟住BB又唔親我,不給我餵奶和抱。到半日假,想帶小朋友出街玩,但其他人又覺得咁細個不要周街去(其實已經一兩歲,識行識走),又話會「吹親BB」(其實已經初夏)。我覺得自己好似做乜都係錯咁。 以上嘅經歷相信好多人都經歷相類似的,也可能是準孕婦將要面對嘅事。正所謂「預防勝於治療」,以過來人嘅經驗有以下建議: 一)唔想坐月時一屋都係人,真係要預先溝通好。預先同家人商量好,那些人真的須要留下幫手。至於陪月,我也建議只請熟人介紹的,因請左了不合心意的,只會令產婦情緒更波動。如果坐月期間真的不想有人探訪,真的要一早說好,以免他人約好來才跟你說,又不好意思推辭。 二)如果是有左先請工人姐姐,建議最好在生之前三個月到,因跟工人姐姐溝通磨合須時。當時我生前一個月才到,大家也不熟大家的脾性和底線。而且請姐姐的首要條件是聽教聽話,尊重媽媽的意願。 三)如果可以,找一個肯定會接納媽媽意見的照顧者幫忙。如果找不到,建議都係自己湊返。 四)隊友對於突如其來的身份轉換無所適從,但請你永遠也站在媽媽旁給予無限的支持,了解媽媽身心所面對的不是這麼簡單!有你的支持,媽媽才能走過艱辛的每一步! 事過境遷,我和家人現在也活得很好。正所謂「清官難審家庭事」,我不希望這分享會為任何人帶來評擊。 今次分享只想給大家作為借鏡。希望大家能預防產後抑鬱症,避免悲劇的發生。 每個幸褔故事背後,可能也隱藏著無數的悲傷。 請好好珍惜和用心關心為你帶來小寶寶的媽媽! 如果喜歡此分享,歡迎你分享給隊友或家人。 ~我是前教師媽媽,喜愛分享育兒教學心得和食玩情報~ ~歡迎瀏覽~like and follow~ ~Facebook page: https://www.facebook.com/Miss.swanswan/ ~Instagram: https://www.instagram.com/little_twin_stars82/ ~e-mail~salet1212@gmail.com