[ #媽媽心聲]生完就會明架喇?生完原來真係會變左第二個人~ 生仔前，有些媽媽朋友告訴我「好多野遲D你就會明架喇!」 生完孖寶後，開始多了一個身份，名為「媽媽」! 估不到會中了「#媽媽降」，好似變左做另一個人咁。 一) #緊張大師 事事緊張，總之關於BB既，不論大事或小事，媽媽都必定大為緊張。 當媽前，出街食飯，見到隔離枱個媽媽係度清潔張high chair和枱面，我心諗須唔須要再清潔一次呢?店員應該已經清潔了吧!而且少少菌唔怕啦~要接觸下先有抗體嘛!小朋友好似過份被保護咁。 當媽後，每次見到有人食飯前唔洗手、入屋後唔洗手又或者換完片唔洗手，總之「#唔洗手」係媽媽眼中已變成一種罪。小朋友唔同大人，抵抗力較差，如果把細菌或病毒食入口，唔病至奇呢!現在d菌和病毒好似愈黎愈惡，甚麼猩紅熱、手足口、新冠病毒等等。總之小朋友病左，小朋友自己辛苦，作為父母既辛苦又心痛。當然要萬事小心! 當媽前，我每晚都訓到成隻豬咁，枕邊人幾時上床訓覺都唔知。 當媽後，BB只要稍有少少風吹草動，我即刻會秒速彈左起身。而且每晚也會自動醒幾次，把手放在BB鼻孔前檢查有冇呼吸。相信每位媽媽也曾經試過吧...哈哈!老公總覺得我傻的嗎~ 二)嫌棄 #豬隊友 唔只嫌棄豬隊友，有時仲覺得好憎佢!(請原諒我咁直接:P)點解老公會由我最愛既人幾乎變成我最憎既人呢? 因為豬隊友總會不自覺做了一些不恰當既行為! 當媽後，我的最愛已由老公變了寶寶。老公只要一做出一些不符合我既湊仔原則時，我就會由老婆變成老虎乸。當他被責備時，他會覺得自己因「小事」而被責罵，之後就會演變成罵戰，瞬間覺得老公是世上最討厭的人!再加上各人湊B方法不同，每一個人總覺得自己既一套是對的，就算我果套真係有根有據，但都不會被接納。當我搵最親既老公呻時，佢又會說「咁可以點?」。OK，我都係想呻下或者睇下有冇改善方法，但「咁可以點?」代表對話已經被結束，連個soulmate都無埋，唔憎佢至奇...哈哈(苦笑中)! 但坦白講，從老公的角度去想，自己第一位的地位由BB出世一刻已被BB取代。以前個老婆可能會晚晚煮飯俾老公食，好好享受晚餐，好好地咁傾下計。現在放工返到屋企，個老婆只掛住照顧BB，計都唔得閒傾。晚上，因怕BB嘈醒，第二日無精神返工，老公同老婆可能要分房訓，連睡房都俾BB霸埋，無唔開心就假! 所以生完BB後，真係要製造下We Time，好好保存這份未有仔女前已有的愛。 三)#情人的位罝 正如之前所講，媽媽已經把BB放在第一位。依個小情人實在無法令人不愛上更多!小情人總是含情脈脈望住你，你已經成為BB的全世界，他無條件咁愛你，同時你會無條件地愛佢。依舊小海棉在還小時，不會發怒，只懂哭和笑。他只需要你，沒有你就會哭。試問這世上還有誰會愛你愛到這麼甜蜜?至於那個豬隊友，只會不斷地遷怒你...嗚嗚~(很悲哀) 四) #手機裡的相片 正因為媽媽已經成為 #BB控，手機中的相片或影片全部都屬於兩隻 #小魔怪。 當媽前，不是 #美食照 就是 #打卡照，但影極都無咁快爆，現在過幾日又要過返D相入電腦。 五) #衣著打扮 當媽前，去街打卡總要打扮下，不介意穿上 #短裙仔，#化下妝和 #戴耳環。 當媽後，最緊要方便輕鬆，不易走光。所以短裙byebye，換上長褲或長裙，耳環或任何首飾和手錶也要byebye了，因為BB還小時，會不斷抓呀抓。而且當他們還小時，何來有時間打扮呢?我還是待他們長大一點，兩、三歲左右出街才會打扮下。 六) #假日活動 當媽前，倆口子 #無憂無慮，去邊都得，係街度周圍走，行下食下飲下hea下影下相咁。再唔係匿係屋企 #煲下劇 睇下戲又一日。 當媽後，放假等於無放假，因要全日服侍小魔怪，甚麼 #餵奶、#換片、#洗奶樽 和 #逗睡 等已成為 #假日之日常 吧! 到他們再大點，又要安排 #親子活動，出街食又要留意邊間餐廰有 high chair先可以入去，連搵餐廰都有所限制，這個假期已不屬我了! 七) #時間分配 當媽前，生活 #優哉游哉，閒時最愛煲劇或者彈下琴、跳下舞、跑下步和做瑜珈。 當媽後，何來會有閒時???連基本既訓覺時間都唔夠!!在他們小時候，我每晚訓三個鐘，仲要係斷斷續續咁訓。每朝起身返工，我都係靠我無窮既意志頂住。如果有時間，#睡覺 是我唯一渴望既活動!! 八) #沒有餓的感覺 當媽前，不知道為何我忍唔到肚餓。我肚餓時，個人好 #忟憎，心情好差，豬隊友就會無辜受罪。其實豬隊友都係一個唔錯既老公..嘻嘻(暗笑中) 當媽後，BB食先，照顧BB為首要任務，自己晏D食有乜所謂呢!犀利到 #連肚餓既感覺都可以忘記! 九) #重要時候唔介意祼露 當媽前，連跟同性去更衣也要 #遮遮掩掩。 當媽後，在家中，只要BB要食奶，不理工人或奶奶在不在，我也坦然給BB吃，這鼓衝動源自 #母愛 呀~係愛呀~#愛令我改變一切! 十) #沒有自己 改變一切後，好似自己都無埋。中了「媽媽降」後，我已經不屬於我，我已屬於一對小寶貝。#時間 俾哂佢地，#心機 又俾哂佢地，連 #金錢 都差不多俾哂佢地...哈哈!(苦笑中) 十一)#媽媽圏 正因為咁，擁有媽媽圈是何其重要!別人不理解，就只有媽媽們才理解。 當媽前，見到媽媽朋友帶埋BB出席聚會，當時我唔太理解點解唔放底係屋企俾其他人照顧?要帶埋出黎咁唔方便?原來在職媽媽同BB既相處時間少之有少，要努力爭取見面既時間，而且會唔捨得BB，仲會擔心照顧者搞唔搞得掂，所以不如帶埋出街好好享受 #親子時光。 慢慢地亦會發覺好多野只有媽媽先會明白媽媽，媽媽間有數之不盡既話題和共同既敵人(大家明啦..哈哈)，所以自然會 #雞啄唔斷。 #媽媽大聯盟 的戰友們在互相支持和鼓勵下成長。真的謝謝我們互相吐過苦水既媽媽們! 最後，我要謝謝寶寶們讓我成長，成為一個努力做到最好，從失敗中學習的媽媽! 我是前教師，喜歡分享教養育兒心得和食玩情報~ 歡迎like and follow~ https://www.facebook.com/Miss.swanswan https://www.instagram.com/little_twin_stars82